Prezidente Repúblika, Francisco Guterres Lú Olo, bainhira halo diskursu iha selebrasaun Loron Proklamasaun Independénsia 28 Novembru 1975 ba dala-44, iha Palásiu Governu, kinta (28/11). Imajen Tatoli/António Gonçalves

DILI, 12 janeiru 2020 (TATOLI)–Prezidente Repúblika (PR), Francisco Guterres Lú Olo kontinua husu Governu atu tau-matan sériu ba asuntu peska ilegál iha tasi Timor. 

Xefe Estadu alerta ba Oitavu Governu liuhusi diskursu komemorasaun Aniversáriu Komponente Navál FALINTIL-Forsa Defeza Timor-Leste (F-FDTL) ba dala 18 (sanulu resin ualu), iha Baze Navál Hera, Dili, domingu ne’e.

Nia haktuir, ameasa iha tasi kada tinan aumenta ho modelu oioin, hanesan peska ilegál, pirataria, transporta sasán perigozu sira, esplorasaun ilegál ba rekursu sira, tráfiku, terrorizmu no imigrasaun ilegál ne’ebé mós akontese iha nasaun seluk.

“Realidade iha Timor-Leste hatudu katak públiku ko’alia barak kona-ba peska ilegál ne’ebé akontese iha ita-nia tasi, ho dadus oioin. Tanba ne’e, ministériu relevante sira presiza tau atensaun aas liután ba asuntu ida-ne’e”, Lú Olo hateten.

Xefe Estadu ho ksolok tebes tanba ohin selebra tan aniversáriu Komponente Navál FALINTIL-Forsa Defeza Timor-Leste ba dala sanulu resin ualu.

Nu’udar Prezidente Repúblika no Komandante Supremu Forsa Armada, nia hakarak afirma katak tasi nu’udár rekursu importante ida husi rai Timor-Leste nian, nu’udár mós objetivu estratéjiku ida ba Timor-Leste ida-ne’ebé bele fó benefísiu barak liután ba rai-ne’e, iha tinan hirak oinmai.

Nia hatutan, nu’udár ativu estratéjiku ho kapitál maka’as, presiza jere tasi ho neon-matenek no rasionalidade tanba tasi hanesan odamatan ba defeza nasaun nian.

Aman nasaun ne’e esplika mós katak Timor-Leste, hanesan nasaun ida ho artikulasaun tranzoseánika, halo parte rota komersiál tasi nian ida, husi rota haat ne’ebé liga tasi-boot Índiku no Pasífiku.

Nune’e, nia dehan, ida-ne’e haforsa Timor-Leste nia potensiál jeoestratéjiku no sai nafatin rekursu boot no metin tebes ba interese nasionál.

“Nune’e, importante tebes atu okupa espasu mamuk sira ne’ebé tama iha ita-nia soberania no jurizdisaun nasionál atu hasees risku okupasaun hosi rai seluk. Atu asegura soberania, Timor-Leste mós tenke promove seguransa koletiva ka seguransa rejionál hamutuk”, nia haklaken.

PR Lú Olo subliña katak Timor-Leste hola parte rejiaun Ázia Pasífiku, ne’ebé ohinloron sai hanesan sentru ekonómiku ida boot no importante tebes iha mundu. Iha rejiaun ida-ne’e hola parte maioria  nasaun illa de’it, katak ho rai keta-ketak, hale’u ho tasi. Nune’e, tasi iha valór boot ba ekonomia nasaun illa sira-nian.

Xefe Estadu argumenta, importante tebes ba Timor-Leste promove ekonomia tasi-nian tanba husi tasi bele kria kampu-serbisu barak liután ba timoroan sira. Haree ba realidade Timor-Leste, kada tinan númeru dezempregu aumenta no ida-ne’e preokupasaun boot ida.

“Haree ba dezafiu no ameasa hirak ne’ebé akontese iha tasi, ita presiza haree ba seguransa nu’udár kestaun koletiva ida ba nasaun hotu-hotu iha rejiaun. Husi abordájen ne’e mak ita hamosu mekanizmu kooperativu ida entre nasaun sira iha rejiaun, hodi responde hamutuk ba ameasa sira ne’ebé akontese iha tasi. Nasaun ida de’it sei labele hatán mesak ba problema sira ne’ebé mosu ho relasaun ho tasi”, nia subliña tan.

Partisipa iha serimónia aniversáriu Komponente Navál ne’e, Xefe Estadu-Maiór Jenerál FALINTIL-Forsa Defeza Timor-Leste, Majór Jenerál Lere Anan Timur, Komandante Komponente Navál, Kapitaun Fragata João Silva, militár sira no konvidadu Sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here