Torre Eletrisidade. Ilustrasaun

DILI, 10 janeiru 2020 (TATOLI)- Hela dook husi liña distribuisaun eletrisidade halo uma kain 10 iha Suku Samalari, Postu Administrativu Baucau Vila, Munsípiu Baucau, seidauk bele asesu eletrisidade hanesan komunidade sira seluk iha suku laran.

Xefe Suku Samalari, Sorteiro Magno Siqueira, informa, maioria komunidade uma kain 513 iha Suku Samalari asesu ona eletrisidade, maibé uma kain 10 de’it mak seidauk tanba hela dook husi liña distribuisaun eletrisidade.

Xefe Suku Sorteiro Magno Siquera, informa ba Ajénsia TATOLI via telefone, sesta (10/01/2020), katak, asesu estrada ba Suku Samalari, di’ak uitoan kompara ho tinan hirak liu ba, maibé tempu udan difikulta uitoan tanba tahu.

“Tempu udan, ami nia komunidade difisil atu asesu transporte públiku tanba ami nia estrada foin aterru seidauk tau alkatraun, tanba ne’e, tahu sa’e maka’as no karreta ka motor halai iha leten namdoras,” hateten Xefe Suku Sorteiro Magno Siquera.

Suku Samalari iha aldeia haat (4), kompostu husi Aldeia Osoluga, Samalari, Festau ho Sorulai. Liuhusi Programa Nasional Dezenvolvimentu Suku (PNDS) loke ona estrada ba aldeia sira, maibé tempu udan arraska uitoan tanba estrada seidauk fui alkatraun.

Aldeia haat iha Salamari asesu ba sentru saúde besik no eskola mós besik, nune’e tuir Sorteiro Magno Siquera, bainhira akontese dezastre ruma, korpu Bombeiru ho lalais to’o kedas.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here