SEA Demétrio do Amaral de Carvalho halo inspesaun ba konstrusaun Hotel Hilton Timor. Imajen/Florencio Miranda Ximenes.

DILI, 10 janeiru 2020 (TATOLI) – Sekretáriu Estadu Ambiente (SEA), Demétrio do Amaral de Carvalho, hateten Empreza Palm Springs Hotel, Lda, hatama ona dokumentu estudu ambientál no planu jestaun ambientál atubele atribui lisensa ba konstrusaun Hotel Hilton Timor.

“Ami hakarak konstrusaun Hotel Hilton halo tuir lei no prosedimentu iha Timor-Leste, espesialmente lisensiamentu ambientál”, SEA Demétrio ba jornalista sira hafoin halo inspesaun ba konstrusaun Hotel Hilton Timor iha Fatuhada, ohin.

SEA halo inspesaun ne’e ho objetivu atu empreza hotu-hotu ne’ebé hala’o konstrusaun iha rai ne’e tuir prosedimentu jestaun ambientál iha Timor-Leste.

Nune’e, eis deputadu ne’e dehan empreza refere hatama tiha ona dokumentu no hetan klasifikasaun lisensiamentu kategoria A tanba mega projetu.

“Ita espera iha tempu badak emite ona lisensa ambientál ba empreza ne’e”, katak.

Sobre Hotel Hilton Timor, eis deputadu ne’e dehan fatin imporante mós tanba futuru Hotel Hilton iha Timor-Leste ne’ebé empreza timoroan koopera ho Hotel Hilton estrela lima.

Hotel Hilton ne’e harii ho andár sia ne’ebé kompleta reziliénsia hasoru dezastre naturál hanesan rai-nakdoko, anin boot, iluminasaun kona-ba temperatura, ár kondisionadu, jestaun bee no lixu inklui kombate inséndiu tuir hotu prinsípiu kombate mudansa klimátika iha Objetivu Dezenvolvimentu Sustentavel (ODS).

“Husi inísiu konstrusaun to’o mai laiha fatalidade no tuir environment sifting iha futuru hotu tuir standard di’ak, tuir duni ambiente nia hakarak”, katak.

Iha fatin hanesan, Diretór Palm Springs Hotel, Jackson Lay, informa konstrusaun Hotel Hilton ho andár sia ne’e hahú husi 2015 no ramata iha outubru 2020 ne’e.

Ne’ebé sei kompleta mós kuadru 200-resin, karreta para fatin, ekipamentu komunikasaun no teknolojia no seluk tan.

Traballadór timoroan kuaze porsentu 85 no restu husi sidadaun estranjeiru. Totál serbisu-na’in kuaze 180.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here