Logotipu PNDS

DILI, 10 janeiru 2020 (TATOLI) – Iha periodu tinan 2019, Programa Nasionál Dezenvolvimentu Suku (PNDS) Munisípiu Dili implementa projetu hamutuk 58 iha aldeia, suku no postu hotu iha Munisípiu Dili ne’ebé konsege finaliza projetu 43 ho nia valor orsamentu $1.248.770,77.

Enjeñeiru PNDS Munisípiu Dili, Prodenciano Maria Soares, hateten, projetu 15 husi total projetu 58 ne’e seidauk termina tanba iha hela konstrusaun nia laran.

“Ha’u bele dehan, fizikamente projetu 2019  nian ajekuta ona porsentu 100, maibé orsamentu foin mak prosesa hela tanba sei halo relatóriu ba gastu parte operasionál no infraestrutura nian,” informa Prodenciano Maria Soares, ba TATOLI iha nia knaar fatin, Matadouro, Dili, sesta (10/01/2020).

Nia dehan, projetu 43 ne’ebé mak finaliza ona iha Postu Administrativu haat (Nain Feto, Dom Aleixo, Vera Crúz, Cristo Rei no Metinaro) mak hanesan toilette públiku, valeta, dalan paseiu ho dalan betaun, lixu móvel, bee moos ho sistema gravitasaun, reabilitasaun fatin lixu, fatin lixu permanente unidade hitu (7), moru eskola, Bronjong, perfurasaun bee moos, estensaun bareira, dapur merenda eskolar, kanalizasaun bee moos no seluk tan.

Restante ne’ebé seidauk mak brojong no moru iha Vila Verde nian, bee moos ba Suku Lahane Osidentál, Hera no Dare no mós drainajen no bee moos ba Metinaro no konstrusaun dapur ba eskola Metiaut nian.

Projetu balu ne’ebé mak PNDS seidauk finaliza tanba traballadór husi suku laran ladún servisu tuir programa no sistema formasaun ne’ebé PNDS oferese.

Prodenciano relata,  PNDS iha planu ba tinan ne’e atu implementa projetu balu iha postu Administrativu Atauro. Maibé, hein hela ba Orsamentu Jerál Estadu (OJE) 2020.

Jornalista : Osória Marques

Editór       : Francisco Simões

 

HAKEREK NO HATÁN

Please enter your comment!
Please enter your name here