Vise Ministru Edukasaun Juventude no Desportu, João Zacarias.

COVALIMA, 10 janeiru 2020 (TATOLI)—Vise-Ministru Edukasaun, Juventude no Desportu (VMEJD),  João Zacarias, hateten durante ne’e nia parte sempre apresia no louva maluk timoroan matenek sira-nia servisu atu dudu área edukasaun ba oin.

“Timoroan sira mesak ema ne’ebé matenek de’it tanba ne’e Ministériu Edukasaun atu asegura no hakru’uk ba esperiénsia no defende inklui valoriza timoroan sira-nia matenek husi nasionál ba to’o munisípiu,” Vise-Ministru João Zacarias hateten perante reprezentante Koordenadór Profesór no formadór sira hamutuk 200 resin ne’ebé partisipa iha enkontru avaliasaun anuál MEJD nian iha Eskola Ensinu Sekundária Jerál Públika (ESGP) Suai, sesta (10/1/2020).

Durante ne’e, nia hateten, Ministériu Edukasaun Juventude no Desportu (MEJD) hetan progresu maka’as husi kapasitasaun ba profesór sira ne’ebé hala’o husi Institutu Nasionál ba Formasaun Dosente no Profisionál Edukasaun (INFORDEPE) ba profesór sira hamutuk ema 14.000.

Esforsu sira ne’e mosu, tuir nia, desizaun balun ne’ebé la valoriza servisu sira ne’e hodi la tau konfiansa ba ema timoroan sira-nia servisu.

Polítika Ministériu nian, nia dehan, hatuur iha mehi ne’ebé boot atu kapasita liután edukadór sira atu sai ema ne’ebé matenek, iha abilidade no adekudu ho kualidade atu nune’e bele uza iha dezenvolvimentu nasionál.

Iha kualidade nu’udar vise-ministru edukasaun, nia kontinua fó nafatin korajen ba INFORDEPE bele fó biban ba profesór sira hodi bele ezerse funsaun sira ne’e ho di’ak atu nune’e iha 2020 bele iha aselera planu sira ne’ebé trasa tiha ona.

Notísia relevante:2020, MEJD Sei Identifika Kualidade Profesór Iha TL

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here