Sorghum ka batar ain-naruk. Imajen/Egas Cristovão.

DILI, 10 janeiru 2020 (TATOLI) – Prezidente Movimentu Asaun Ekonomia Komunitária (MAEKOM), Rui Maunel Castro, dezafia polítika Sekretáriu Estadu Kooperativa (SEK), Arsénio Pereira da Silva, hodi distribui mákina prosesamentu produtu Batar Ain-Naruk (Sorghum) hamutuk 152 ba Movimentu Kamponeza Timor-Leste (MOKATIL) atu bele  hatudu prova duni iha rezultadu hasa’e produsaun Sorghum no batar Kay Rala hodi fa’an iha merkadu Timor-Leste.

Notísia Relevante : SEKoop Entrega Mákina Prosesamentu Sorghum Unidade 152 ba MOKATIL

Prezidente MAEKOM, Rui Manuel Castro. Imajen/Eugénio Pereira

Emprezáriu Timor-oan ne’e preokupa no kestiona, dezde uluk kedas Ministériu Agrikultura no Peska (MAP) no Ministériu Komérsiu Indústria fahe ona tratór ki’ik no tratór boot hale’u Timor-Leste, maibé rezultadu produsaun hare ou foos no produtu seluk seidauk sa’e tuir tarjetu governu nian atu fa’an domina iha merkadu Timor-Leste.

Nia dehan, esperiénsia ne’ebé sira identifika tratór balun ne’ebé uluk governu fahe balun aat de’it, tanba de’it jestaun manutensaun ba mákina la iha. Nune’e tratór barak iha Betano no fatin barak tan paradu no uitoan de’it sei funsiona.

“Ha’u espera mákina sira ne’ebé membru governu sira fahe ne’e fulan tolu haat mai ne’e iha rezultadu atu hasa’e produsaun lori produtu tama mai fa’an iha loza agrikultura,” dehan Rui Castro ba Ajénsia TATOLI iha Loja Agrikultura Fatuhada, Dili, sesta (10/01/2020).

Notísia Relevante : MOKATIL sei Define Presu ba Sorghum Liuhusi Asembleia Traballu

Serimónia entrega mákina prosesamentu sorghum husi Sekretáriu Estadu Kooperativa Arsénio Pereira da Silva ba MOKATIL. Imajen/Natalino Costa.

Nia dehan, mákina produsaun Sorghum unidade 152 ne’ebé fahe ba Movimentu Kamponeza Timor-Leste (MOKATIL) sosa ho osan rihun $616 ne’ebé ho valor orsamentu ida boot tebes no tenke iha jestaun manutensaun ba mákina sira ne’e.

Mezmu dezafia, maibé  Rui Castro hato’o parabéns ba SEK Arsénio ninia esforsu hodi koopera ho MOKATIL atu servisu makas koopera ho agrikultór sira atu hasa’e produsaun ai-han rai laran hodi lori Timor-Leste labele dependénsia ba produtu rai li’ur nian.

SEK Arsénio rasik deklara katak, MOKATIL hamriik atu lori povu badinas halo toos labele dependénsia makas ba programa governu nian, maibé oinsá atu mobiliza aan hodi halo rasik iha toos, kaer rasik, no la’o tuir saida mak iha para hadi’a ekonomia Timor-Leste.

Jornalista : Eugénio Pereira

Editór       : Francisco Simões

 

1 KOMENTÁRIU

  1. programa fahe makina ba povu (pavu Agrikultor) no programa politika hasae produsaun iha rai laran los ona maibe governu bele hapara importasaun ai han husi liur mai TL ga lae, selae kada legislatura membru governu sira mak fahe makina hela deit kontinua bosok povu hodi dehan hasae produsaun rai laran enkuantu governu kuntinua importa aihan husi rai liur mai rai laran ho kuantidade neebe boot no aihan hirak nee faan ho presu neebe baratu liu fali kompara ho produtu rai laran neebe ho presu karun liu.

HAKEREK NO HATÁN

Please enter your comment!
Please enter your name here