Deputada Maria Angelina Lopez Sarmento. Imajen Tatoli/Egas Cristóvão.

DILI, 10 janeiru 2020 (TATOLI)—Vise-Prezidente Parlamentu Nasionál, Maria Angelina Lopes Sarmento, hakfodak ho Ministru Obra Públiku en-ezersísiu atuál Vise-Ministru Obra Públika, Nicolau Lino Freitas Belo, ne’ebé pronúnsia ba deputadu sira katak liña ministeriál bele jere orsamentu millaun $5 ba leten, maski Lei Jestaun Finanseira la fó dalan.

“Bainhira Komisaun C audiénsia ho Ministériu Obra Públika, Vise-Ministru Obra Públika pronúnsia katak Governu kontinua mantein osan ba projetu sira ne’ebé mak dentru orsamentu millaun $5, ne’ebé jere hosi liña ministeriál sira,  enkuantu Lei Jestaun Finanseira númeru 13/2009, 21 outubru, hateten katak orsamentu ne’ebé mak liu millaun $1 ne’e kabe ba fundu infraestrutura ne’ebé KAFI (Konsellu Administrasaun Fundu Infraestrutura) mak jere”, Deputada Maria Angelina Sarmento, ko’alia iha Parlamentu Nasionál, kinta ne’e.

Tanba ne’e, nia haktuir, parte Komisaun C (trata Asuntu  Finansa Públika) nian husu ba Vise-Ministru Obra Públika, Nicolau Lino Freitas Belo, atu hato’o ba Konsellu Ministru, nune’e bele haree filafali tanba Lei Jestaun Finanseira seidauk muda atu fó dala ba liña ministeriál sira bele jere orsamentu millaun $5 ba leten.

Antes ne’e, Governu prevee proposta orsamentu 2020 ho montante millaun $26,5 bele jere hosi liña ministeriál no ajénsia sira, maibé Parlamentu la aseita, ikusmai Parlamentu Nasionál husu Governu retira.

“Se mantein ho millaun $1 mak bele jere hosi liña ministeriál. Millaun $5 ba leten ne’e fora kompeténsia. Ida-ne’e parte ida hotu sai problema iha proposta orsamentu tinan kotuk nian, tan ne’e Parlamentu husu Governu retira”, deputada PLP ne’e subliña.

Proposta foun hosi Ministériu Obra Públika hamutuk millaun $229,514 (antes ne’e millaun $270,643,809), kompostu Saláriu no Vensimentu millaun $5,279 (antes ne’e millaun $5,741), Bens no Serbisu millaun $195,259 (antes ne’e millaun $ 204,884), Transferénsia Públika millaun $1 (mantein), Kapitál Menór millaun $3,403 (antes ne’e millaun $5,305) no Kapitál Dezenvolvimentu millaun $24,572 (antes ne’e millaun $53,733).

Purtantul, proposta foun 2020 nian, Governu prevee millaun $488,837 ba iha Kapitál Dezenvolvimentu (esklui empréstimu). Medida prinsiál hosi kategoria Kapitál Dezenvolvimentu, millaun $238,3 prevee ba iha Fundu Infraestrutura, millaun $100,559 ba RAEOA-ZEESM destinadu ba projetu oioin, millaun $61 destinadu atu konstrui postu saúde no klínika no millaun $9,4 ba Autoridade Munisipál sira destinadu ba projetu oioin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here