Futuru edifísiu Dili Financial Business Center. Imajen/Florencio Miranda Ximenes.

DILI, 10 janeiru 2020 (TATOLI) – Sekretáriu Estadu Ambiente (SEA), Demétrio do Amaral de Carvalho, hatete konstrusaun edifísiu Dili Financial Business Center (DFBC) ne’ebé halo husi empreza Portugál, ENSUL Engenharia, S.A ne’e, tuir duni prinsípiu no lei ambientál ne’ebé Timor-Leste adota.

”Ha’u hanoin katak konstrusaun ne’e standard ida no tuir ona prinsípiu jestaun ambientál ninian”, SEA Demétrio afirma bainhira halo inspesaun ba konstrusaun DFBC ne’e iha Colmera-Dili, ohin.

Tuir prinsípiu ambientál, Demétrio dehan enjeñeiru sira esplika iha dokumentu katak konstrusaun reziliénsia hasoru dezastre naturál hanesan rai-nakdoko, anin boot, iluminasaun kona-ba temperatura, ár kondisionadu (AC, sigla inglés) no sistema sira ne’e tuir hotu prinsípiu kombate mudansa klimátika husi Objetivu Dezenvolvimentu Sustentavel (ODS) 17 reprezenta ajenda sesitividade planeta nian.

Konstrusaun ne’e sai futuru edifísiu DFBC ne’ebé konstroe husi empreza portugeza ho andár 15 iha sidade Dili.

Diretór Produsaun Empreza ENSUL Engenharia, S.A, Armando Rodrigues, esplika hela konstrusaun edifísiu DFBC ba SEA Demétrio do Amaral de Carvalho. Imajen/Florencio Miranda Ximenes.

Nune’e, SEA dehan inspesaun ne’e servisu normál tanba daudaun kompañia ENSUL Engenharia, S.A, hatama ona dokumentu no planu jestaun ambientál atubele trata hela lisensiamentu ambientál.

“Ita espera iha tempu badak finaliza no halo avaliasaun téknika hodi kompleta prinsípiu ne’ebé ambiente eziste hodi atribui lisensa iha tempu”, espera.

SEA hala’o inspesaun ne’e ho objetivu atu empreza hotu-hotu ne’ebé hala’o konstrusaun iha rai ne’e tuir prosedimentu jestaun ambientál iha Timor-Leste, la’ós impede dezenvolvimentu.

Entretantu, Diretór Produsaun Empreza ENSUL Engenharia, S.A, Armando Rodrigues, informa edifisiu ne’e harii ho estruturál forte no ekipamentu tuir duni prinsípiu ambientál ne’ebé adota iha Timor-Leste.

“Konstrusaun ne’e fó prioridade ba prinsípiu ambiente liuliu tratamentu ár, sistema jestaun bee, eletrisidade no komunikasaun”, salienta.

Konstrusaun ba instalasaun (edifísiu) ne’e sei termina iha abríl 2020, maibé fízikamente ne’e sei remata iha 2021 tanba daudaun ne’e konstroe ona to’o andár 12 ne’ebé sei kontinua finaliza até 15.

Traballadór ne’ebé serbisu hamutuk na’in-70 kompostu husi timoroan 40 no estranjeiru 30 hanesan enjeñeiru husi Portugál no balun Indonézia.

Istórikamente iha 2009, ENSUL Engenharia, S.A, hetan aprovasaun hosi Governu liuhosi reuniaun Konsellu Ministru bá arrendamentu rai ho nia luan metru kuadradu 22.635,00 iha kedas sidade Dili ho investimentu millaun $18. Iha 16 dezembru 2013, Kuartu Governu Konstitusionál ne’ebé lidera hosi Primeiru-Ministru, Kay Rala Xanana Gusmão, halo lansamentu ba fatuk dahuluk.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here