Matebian Márcia dos Santos. Imajen: Nelia Fernandes

DILI, 10 janeiru 2020 (TATOLI)-Instituto Profesional de Canossa (IPDC) triste tanba lakon ona estudante finalista Márcia dos Santos. Matebian nu’udar estudante finalista IPDC, iha kursu Informátika no Jestaun Administrativa.

“IPDC lakon tiha ona ema ida ne’ebé di’ak no intelejente tebes. Agora situasaun hanesan ne’e ona, ne’ebé ita entrega ba Maromak de’it,” Vise-Reitór Asuntu Estudantil, Jaimé da Costa Lobo Soares, ba Ajénsia TATOLI iha nia kna’ar fatin, Canossa, Comoro, Dili, ohin.

Vise-Reitór ne’e haktuir, matebian nu’udar joven ida di’ak no bele kontribui ba uma-kreda, estadu no sosiedade liuhusi bukae ne’ebé IPDC fó maibé buat hirak ne’e sei la aplika duni ona husi matebian. “Maibé, ami fiar katak husi parte família sei fó konfiansa nafatin mai ami atu bele delega nafatin nia família, nia oan sira atu bele kontinua nafatin mai estudu iha IPDC,” nia dehan.

Manorin na’in IPDC, Jaimé da Costa Lobo Soares haktuir katak matebian Márcia dos Santos ema ida gosta nonok no kalma. Maske nune’e, la espera dezastre kona tiha nia.

“Ami rona Márcia fugaun han. Fugaun nakfera mak ahi han nia isin-lolon tomak. Entaun iha momentu ne’ebá husi parte família nian konsege lori duni Márcia ba ospitál”.

Nia aumenta, iha momentu ne’ebá Márcia nia família balun informa ba IPDC katak matebian Márcia agora halo ona tratamentu iha Hospital Nacional Guido Valadares (HNGV).

“Ami mós promete hela atu ba, maibé komu momentu ami prepara hela ba graduasaun no akreditasaun ni’an entaun ami la konsege ba vizita nia iha ospitál nasionál”.

Nune’e, Vise Reitór, Asuntu Estudantil Jaimé Soares katak, tuir informasaun ne’ebé estudante sira dehan kondisaun Márcia nia presiza hetan atensaun ne’ebé di’ak liután, entaun husi parte nasionál sujere para transferénsia Márcia ba iha Indonézia.

“Informasaun ne’e ami simu, ami mós tenta husu nafatin estudante sira, entaun iha prosesu atu transfere nia ba, sei hasoru problema difikulta barak, depois trata dokumentu no pasaporte sira ne’e hotu, ita la hatene situasaun husi parte ospitál nasionál ni’an hanusa”.

Iha parte seluk, Paulo Loreiro hanesan maun-boot matebian nian haktuir kronolojia katak ahi fugaun han matebian Márcia dos Santos bainhira ema ida la iha uma. Nia mesak nia fila husi kampus mai, nia atu sona manu-tolun, entaun nia hadi’a uluk fugaun, pois nia atu te’in parese nia roupa iha minarai balun kona, entaun nia sunu uluk fugaun ne’e.

Nia fila kotuk atu baku manu-tolun ne’e ahi han husi kotuk, nia la konsiente, hakfodak ahi han maka’as ona.

“Depois nia hakilar, viziñu sira sai ba kala nia roupa ahi han tiha, entaun nia la loke odamatan entaun nia telefone ha’u nia tia, tia ho karreta Marrie Stopes mai tula nia ba ospitál tanba iha momentu ne’ebá roupa ahi han hotu ona,” matebian nia maun konta tuir.

Nune’e, nia maun Paulo Loreiro esplika, depois ho Márcia nia moras halo tratamentu iha HNGV iha loron 9, depois 24 halo ona tratamentu iha Bali, iha ospitál Sanglah.

Tratamentu iha Bali buat hotu di’ak, hanesan sente agora tanba akontesimentu iha 9 iha to’o 24 foin ba to’o dia 30 halo operasaun to’o 6 iis komesa tun. Nia iis tun uitoan tanba iha impaktu nia toba demais besik fulan ida, entaun iha nia pulmaun bee iha, entaun sira konsege halo operasaun ida.

“Depois sira tau alat bantu ida kona-ba nafas nia, depois sira konsege supa sai bee ne’e agua boot ida, maibé supa la hotu, pas iha 7 jam 17: 50 nia hakotu iis”.

Nia katak, hanesan família, hanesan maun-boot sente triste tebes tanba tratamentu tarde ona. “Karik Governu haruka sedu parese bele salva,” matebian nia maun-boot konsidera.

Entretantu, molok atu ba haloot nia isin, matebian lori hodi despede ho IPDC liliu estrutura akadémika, dosente no nia kolega sira.

Matebian Márcia dos Santos moris iha 28 dezembru 1995, iha Vanualu Maubara. Matebian nu’udar oan daruak husi Américo Tomas no Elisa dos Santos.

Adeus Márcia dos Santos! Hakmatek ba nia klamar iha Lalehan.

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here