Funsionáriu Gabinete Apoiu Atividade Konjuje Prezidénsia Repúblika, fahe hela prezente Natál ba orfanatu sira husi Annur Kampung Alor. Imajen TATOLI/Cipriano Colo

DILI, 10 janeiru 2020 (TATOLI)–Espoza Prezidente Repúblika (PR), Cidália Nobre Lopez Mouzinho Guterres enkoraja ema hotu atu tulun malu, liuliu tulun ema sira ne’ebé merese duni atu hetan tulun hanesan orfanatu sira. 

Cidália hato’o liafuan korajen ne’e bainhira selebra Natál hamutuk ho labarik orfanatu sira iha Palásiu Nobre, Lahane, sesta ne’e.

Nia hateten, Natál hanesan tempu oportunu ida-ne’ebé sai inspirasaun ba ema kristaun sira iha Timor no mundu inklui ema naun Kristaun sira atu buka tulun malu, halo karidade no sakrifísiu ba ema seluk iha moris loroloron.

“Natál nu’udár tempu di’ak atu tulun malu, ajuda maun-alin sira, fó ho domin”, Cidália subliña.

Inan nasaun ne’e mós fó hanoin katak karidade no sakrifísiu ne’ebé presiza banati tuir maka, buat ne’ebé São José ho Nossa Senhora hatudu iha momentu sira na’in rua ho sakrifísiu boot, iha kalan boot, hodi buka fatin ba Jesus atu moris.

“Atu ida-ne’e nu’udár atu ida-ne’ebé fó mensajen kle’an ba ita ema atu halo buat hotu ho sakrifísiu, pasiénsia, liuliu halo karidade ba maun-alin sira ho domin”, nia esplika.

Esperiénsia no ezemplu ne’e, sai mós inspirasaun ba Gabinete Apoiu Atividade Konjuje Prezidénsia Repúblika atu hahú serbisu hamutuk mós ho grupu vulnerável sira, liuliu labarik orfanatu iha uma-mahon sira, oinsá konsola, motiva ho apoiu morál no materiál, inklui lori hikas sira ba asesu edukasaun.

Ikusliu, inan nasaun ne’e lori Prezidente Repúblika nia naran hanesan aman nasaun maihusi família ida hakarak hato’o dala ida tan boas festa Santu Natál no ksolok Tinan Foun ba labarik orfanatu sira ne’ebé ohin halibur malu hodi selebra hamutuk Natál 25 Dezembru tinan 2019, hato’o mós ba família, instituisaun hotu no komunidade en-jerál.

Iha fatin hanesan, Ana Paula Maria de Jesus husi Forum Komunikasaun Juventude Oratóriu Don Bosco Comoro reprezenta orfanatu husi uma-mahon sira hotu agradese ba espoza Prezidente Repúblika, Cidália Mouzinho Nobre Lopes Guterres ho nia Gabinete ne’ebé fó apoiu morál ba uma-mahon sira.

“Ami hakarak hato’o agradesimentu kle’an ba ita-boot nia apoiu mai ami, laiha buat ida-ne’ebé ami bele fó, maibé ami-nia dezeju susesu ba inan nasaun ho nia gabinete tomak”, Ana Paula hateten.

Iha serimónia Natál hamutuk ne’e, inan nasaun ho gabinete oferese mós prezente Natál ba orfanatu sira.

Orfanatu sira-ne’e mai husi Orfanatu sira iha uma-mahon Forum Komunikasaun Juventude Oratóriu Don Bosco Comoro, orfanatu Madre Alma Bebonuk no orfanatu Annur Kampung Alor no Samaria.

Marka prezensa iha Natál hamutuk ho orfanatu sira ne’e, espoza Xefe Estadu Maiór Jenerál F-FDTL, reprezentante femenina instituisaun PNTL no F-FDTL.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here