Prezidente TLPU, Manuel Pinto ho estrutura hala’o sorumutuk ho Sekretáriu Estadu Komunikasaun Sosiál, Merício Juvinal dos Reis ‘Akara’, iha Palásiu Governu. Imajen/Mídia SEKOMS

DILI, 09 janeiru 2020 (TATOLI) – Prezidente Timor-Leste Press Union (TLPU), Manuel Pinto, hateten sira nia parte sei haree posibilidade hotu hodi tuur hamutuk, nune’e bele hametin no sai parseiru di’ak ho Governu atu dezenvolve setór komunikasaun sosiál iha Timor-Leste.

“Sekretaria Estadu sira nia polítika klaru, katak prontu atu apoiu assosiasaun jornalista sira iha Timór, naran katak ita nu’udar asosiasaun iha polítika, planu no programa ne’ebé fiksu hodi foku atu dezenvolve kualidade no kapasidade jornalista sira nian. Entaun ami sei haree posibilidade tomak hodi foti oportunidade balun ne’ebé iha atu bele sai parseiru ba ita-nia Governu hodi dezenvolve setór komunikasaun sosiál”, nia dehan iha Palásiu Governu, kinta ne’e.

Notísia Relevante: Manuel Pinto, Prezidente TLPU 2020-2024

Iha parte seluk, estrutura TLPU hala’o sorumutuk ho Sekretáriu Estadu Komunikasaun Sosiál, Merício Juvinal dos Reis ‘Akara’ atu hato’o kumprimentu hafoin estrutura foun simu pose iha loron 21 dezembru 2019.

“Ami hanesan eatrutura foun, ohin mai hato’o kumprimentu ba Sekretáriu Estadu Komunikasaun Sosiál (SEKOMS) tanba ami nia estrutura hahoris mós hosi apoiu finanseiru hosi SEKOMS rasik. Entaun ami mai hato’o obrigadu. Ami mós hakarak mai rona polítika Governu nian, oinsá atu apoiu ba orgaun komunikasaun sosiál iha nasaun ne’e”, subliña Prezidente TLPU

Biban ne’e, la haluha mós ekipa ne’e konvida SEKOMS atu partisipa iha toma posse ba estrutura foun TLPU ne’ebé sei hala’o iha tempu besik.

Jornalista: Hortênçio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here