Ministra Finansa en ezersísiu, Sara Lobo Brités, Imajen/Egas Cristovão.

DILI, 09 janeiru 2020 (TATOLI) – Ministra Finansa en-ezersísiu, Sara Lobo Brites, informa iha 2020 ne’e, orsamentu ba Rejiaun Administrativa Espesiál Oe-Cusse Ambeno (RAEOA) integra ba iha sistema Government Resources Planning (GRP) ka Planu Rekursu Governu.

“Iha tinan ne’e, RAEOA ninia orsamentu integra mai finansa iha Governu sentrál no atu integra ida ne’e, preparasaun orsamentu ne’e rasik tenke aliña hanesan mós ajénsia sira seluk”, Sara Lobo Brites hatete iha Parlamentu Nasionál, ohin.

Atuál Vise-Ministra Finansa ne’e dehan RAEOA nia orsamentu iha tinan antes tau iha kategoria transferénsia publika depois maka transfere ba RAEOA maka ezekuta.

“Maibé tinan ne’e, aloka kedas ona tuir ninia kategoria hanesan, saláriu no vensimentu, bens no servisu, kapitál dezenvolvimentu, kapitál menór, no transferénsia públika. Ne’e para fó dalan orsamentu foun kuandu tama ona maka RAEOA uza ona sistema GRP”.

Antes ne’e, ezekusaun orsamentu ba RAEOA seidauk integra iha sistema GRP, nune’e labele tau iha portál transparénsia hanesan mós ministériu no instituisaun Estadu sira.

Notísia relevante : Ezekusaun Orsamentu RAEOA Seidauk Integra iha GRP

GRP hanesan sistema ne’ebé Governu uza durante ne’e liuhosi Ministériu Finansa (MF) atu halo jestaun finanseira hodi apoiu prosesu transferénsia orsamentu ba programa Governu hanesan idozu, bolsa da mãe, bolsu estudu, veteranu no seluk tan.

Iha proposta orsamentu foun 2020 ba RAEOA no Zona Espesiál Ekonomia Sosiál Merkadu hamutuk millaun $127,206.

Husi montante ne’e fahe ba kategoria saláriu no vensimentu hamutuk millaun $8,819, bens no servisu millaun $14,484, transferénsia públika millaun $2,783, kapitál menór rihun $520, no kapitál dezenvolvimentu millaun $100,599.

Prezidente RAEOA, José Luis Guterres, hatete osan sira ne’e sei kontinua obra ne’ebé hala’o tiha ona no obra foun ne’ebé tenke halo hanesan dezenvolve zona rurál no bee-moos iha Oe-Cusse no Ataúro.

“Orsamentu ne’ebé aloka ba iha kapitál dezenvolvimentu atu utiliza ba iha kontinuasaun obra ne’ebé hala’o ona hanesan estrada balu, protesaun ba aeroportu hanesan halo moru, no proteje aeroportu hosi tasi, no halo tan buat seluk nune’e ICAO (Organizasaun Internasionál Aviasaun Sivíl) bele atribui sertifikadu nivel internasionál nune’e aviaun hosi rai seluk bele tun ona iha rai Oe-Cusse”, Lugu afirma iha Parlamentu Nasionál, foin lalais ne’e.

Prezidente subliña, prioridade ne’ebé sei halo iha 2020 maka investe iha sub rejiaun tolu iha RAEOA, ne’ebé durante ne’e seidauk sente dezenvolvimentu, maski Oe-Cusse iha ona estrada, aeroportu, portu no ponte, maibé povu baibain seidauk iha liuliu bee-moos.

“Ami promete de’it katak osan ne’ebé aloka ba RAEOA sei utiliza hodi benefisia povu”, Lugu garante.

Iha orsamentu 2019 ba RAEOA-ZEESM hamutuk millaun $76, ne’ebé kompostu husi kategoria saláriu no vensimentu millaun $8,818, bens no servisu millaun $14,483, kapitál menór millaun $1,697, kapitál dezenvolvimentu millaun $47,216, transferénsia públika millaun $2,783 no fundu kontinjénsia millaun $1.

Notísia relevante : RAEOA Sei Uza Sistema GRP Iha Tinan 2020

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here