Transporte para iha Estasionamentu iha área Banco Nasionál Ultramarinho (BNU) nia oin. Imajen/Eugénio Pereira

DILI, 09 janeiru 2019 (TATOLI)- Polisia  Nasional Timor-Leste (PNTL) Munisípiu Dili trasa ona ajenda, atu iha semana oin, sei tun direita ba terrenu hodi sensibiliza regra ba públiku, liu-liu motorista sira, oinsá utiliza fatin estasionamentu.

Notísia Relevante : Maioria Utilizadór La Kompriende Estasionamentu

Polisia rekoñese durante ne’e públiku sira la sensitivu ba sinais estasionamentu entre karreta no motór nian, mezmu Estadu kria ona kondisaun, maibé sosiedade sei menus koñesimentu.

“Ita sei sensibiliza regra utiliza fatin estasionamentu sira ne’ebé ita nia Diresaun Nasionál Transporte Terrestre (DNTT) rasik monta  para ita nia públiku liu-liu motorista sira tenke kumpre hodi  para karreta ho motór,”  informa Segundu  Komandante PNTL Munisípiu Dili, Superintendente Asistente Euclides Belo, ba jornalista iha nia knaar fatin, kinta (09/01/2020).

Sensibilizasaun ne’e sei hala’o direita husi Polisia Tránzitu Dili, Ofisiál Estasionamentu no Ekipa DNTT.

Notísia Relevante : Munisípiu Dili Rekolla $59.107.65 Hosi Taxa Estasionamentu

DNTTT  monta ona sinais tránzitu no regra kompletu iha fatin estasionamentu sira iha Audian, Colmera, Vila-Verde, Portu Dili, Bemori ho Merkadu Taibesi nian, maibé públiku barak kontinua para transporte la tuir regra.

“Ita hakarak orienta para ita nia motorista sira bainhira lori karreta tenke para iha fatin karreta nian, la’ós para fali iha motór nian fatin, nune’e mós ba motór para iha motór nia fatin,”  Euclides tenik.

Hafoin hala’o tiha sensibilizasaun maka públiku sira kontinua viola regra, Euclides afirma, e polisia sei halo kontrolu no fó infrasaun ba motorista sira hodi selu multa.

PNTL rasik halo analiza  iha kapitál Dili agora kada loron husi dadeer, loro manas no lokraik sei mosu engarrafamentu iha fatin balun, tanba públiku utiliza transporte para arbiru de’it.

Iha parte seluk, Euclides Belo informa mós situasaun seguransa iha Dili laran, hahú husi loron 01 too loron 09 janeiru 2020, la’o ho hakmatek no bairru-bairru  sira iha Dili laran kontroladu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here