Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 09 janeiru 2020 (TATOLI)—Parlamentu Nasionál (PN) husu Governu distribui livru orsamentál 2020 nian tenke bazeia ba kuantidade deputadu sira.

Livru orsamentál hamutuk ualu (8). Livru 1 deskreve kona-ba panorama orsamentál, livru 2 deskreve planu asaun anuál, livru 3A ko’alia kona-ba fundu infraestrutura, livru 3B dekreve kona-ba munisípiu, livru 3C deskreve RAEOA-ZESSM, livru 4AB deskreve rúbrika orsamentál, livru 5 deskreve parseiru dezenvolvimentu no livru 6 deskreve fundu espesiál-FDCH.

Vise-Prezidente Parlamentu Nasionál, Deputada Maria Angelina Lopes Sarmento, klarifika la’ós livru mak la kompletu maibé númeru ka kuantidade livru mak la korresponde ba deputadu sira hamutuk 65.

Nia fó ezemplu, livru 2 ne’e sukat Estadu ne’e tomak ba tinan 2020 ne’e saida mak atu halo no kada programa nia orsamentasaun. Livru fundu espesiál ne’e halai liubá Fundu Kapitál Umanu, barak liu apoia dezenvolvimentu rekursu umanu nian, liuliu bolsu estudu.

Nia hateten, se livru la kompletu, iha impaktu boot tebes, tanba livru panorama orsamentál deskreve medida prinsipál sira, kategoria orsamentu sira, ekonomia makro, ekonomia mikro, reseita sira.

Tanba livru hirak-ne’e Governu submete ba Parlamentu Nasionál hanesan livru komplementár totál 10, ne’ebé alvu ne’e ba liu prezidente bankada Parlamentár sira ho meza Parlamentu, entaun ho kópia 10 de’it deputadu 65 la asesu hotu.

“Agora livru ne’ebé Governu la konsege aprezenta mak livru 2, ho razaun Governu dehan iha mudansa ba livru 2 hosi 2020 nian, maibé ami deputadu sira haree katak laiha lójika tanba livru 2 ne’e kona-ba Planu Asaun Anuál. Ba ami laiha lójika tanba ita redús orsamentu maibé planu la redús entaun orsamentu ne’e elabora bazeia ba planu ida. Se orsamentu redús signifika planu mós iha mudansa”, Deputada Maria Angelina Sarmento informa ba jornalista sira, iha PN, kinta ne’e.

Parlamentu Nasionál ejize Governu submete mós livru Planu Asaun Anuál tenke korresponde ho orsamentu no mudansa ba orsamentu. Signifika, planu asaun anuál mós iha mudansa.

“Tanba ezijénsia hosi deputadu sira mak Governu esforsu duni halo livru planu asaun anuál, ne’ebé iha livru ne’e deskreve ona programa bazeia ba polítika Estadu nian ne’ebé dezenvolve ita-nia Orsamentu Jerál Estadu ba kada programa. Livru 2 ne’e Governu submete ona”, Maria Angelina haktuir.

Deputadu ne’e subliña, dezde inísiu kedas PN husu Governu atu providénsia dokumentu sira ho livru komplementár iha versaun eletrónika.

Dokumentu komplementár ne’ebé Governu submete ho USB, atu deputadu sira bele asesu hodi hein livru sira Governu bele imprime, Parlamentu bele asesu daudaun dokumentu versaun eletrónika hodi bele halo leitura no bele prepara ba audiénsia sira.

“Ha’u hanoin Governu tenke esforsu halo tan, tenke distribui livru sira ho númeru kompletu bazeia ba kuantidade deputadu sira iha Parlamentu ida-ne’e”, nia katak.

Deputada Bankada PLP ne’e rekoñese, maski deputadu sira simu ona laptop maibé la’ós deputadu hotu-hotu iha koñesimentu atu oinsá utiliza laptop. Balun sei hasoru difikuldade atu uza laptop. Balun sei hasoru difikuldade atu hatene oinsá loke programa sira. Entaun, livru ne’e ajuda tebes deputadu sira atu haree planu no orsamentu ida-ne’e.

Hatán ba preokupasaun ne’e, Sekretáriu Estadu Komunikasaun Sosiál reprezenta VIII Governu Konstitusionál, Merício Juvenal dos Reis Akara esplika livru orsamentál aprezenta hotu ona ba Parlamentu Nasionál.

“Hakarak reprezenta Governu dehan katak livru mai hotu ona. USB hamutuk 65 entrega ona ba Parlamentu Nasionál. Lahatene, se internál maka la konsege distribui, maibé hosi parte Governu entrega hotu ona ho konteúdu prodús iha livru sira-ne’e”, Merício Akara tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here