Prezidente Konsellu Konsultivu Fundu Petrolíferu (KKFP), Amu Júlio Crispim Ximenes Belo. Foto/Google.

DILI, 09 janeiru 2020 (TATOLI)–Haree husi aspetu polítika no jurídika, Jurista Padre Júlio Crispim Ximenes Belo konsidera elaborasaun Proposta Orsamentu Jerál Estadu (OJE) tinan 2020, Parlamentu Nasionál (PN) ho VIII Governu Konstitusionál sakrifika ezijénsia jurídika.

“Bele dehan, VIII Governu no PN sakrifika ona ezijénsia husi prinsípiu Seguransa Jurídika ka serteza jurídika, no prinsípiu justisa nu’udár Fins do Direito, inklui sakrifika mós ezijénsia husi prinsípiu direitu demokrátiku artigu 1 númeru 1 KRDTL, nu’udár prinsípiu fundamentál ba Estadu RDTL”, Padre Júlio esplika iha nia hela fatin, Praia dos Coqueiros, Dili, ohin.

Jurista ne’e hateten, tinan-tinan, Governu hatama OJE ba PN liuhusi Lei Orsamentu Jestaun Finanseira (OJF) artigu 30 númeru 1 ho nia loron hatama mak 15 outubru no PN simu OJE tuir Rejimentu PN artigu 162 ho nia loron hatama mak 15 outubru.

Ne’e katak, nia esplika, Governu lori OJE ba PN nia dalan mak Lei OJF artigu 30 númeru 1 no PN simu OJE husi Governu nia dalan mak Rejimentu PN artigu 162. Husi 15 outubru ne’e mak sura loron 60 ne’ebé hatuur iha artigu 86 alínea f.

“Signifika, iha inísiu, OJE 2020 husi VIII Governu ba PN hatama tuir duni dalan legál, maski hatama iha 16 outubru, atraza loron ida, PN sei hakarak tolera, maibé Governu retira fali OJE 2020 ne’e iha 3 dezembru 2019. Maibé, liu duni dalan retira proposta lei baibain ne’ebé hatuur iha artigu 95 númeru 2 Rejimentu Parlamentu Nasionál bele dehan kanselamentu inisiativa lejizlativa, tanba dalan espesífiku ba retira OJE nu’udár proposta lei espesiál laiha. Maski nune’e, kolega sira balun dehan bele, maibé ha’u dehan, ne’e la’ós nia dalan, tanba Lei OJF no Rejimentu Parlamentu Nasionál (RPN) nia regra espesífika ba OJE la prevee situasaun espesífiku ne’e”, Padre Júlio Crispim haklaken.

Preokupasaun husi jurista ne’e maka Governu hatama fali OJE 2020 ba PN, ne’ebé tuir loloos tenke dehan tuir lei, hatama fali iha 13 dezembru, depois muda ba iha 19 dezembru, hatama rohan de’it, rohan seluk sei hatama iha 14 janeiru 2020.

“Sei hatama liuhusi dalan ida-ne’ebé ka hatama uza baze legál ida-ne’ebé. Tuir ha’u, hatama fali, dalan legál taka hotu ona, no úniku loke fali ba Governu foun”, nia esplika.

Atuál Prezidente Konsellu Konsultivu Fundu Petróliferu ne’e subliña iha ema balun argumenta dehan, primeiru, VIII Governu bele hatama nafatin liuhusi Lei OJF artigu 30 númeru 1 no PN simu fali liuhusi Rejimentu PN artigu 162, maibé dalan hirak-ne’e taka ona iha 15 outubru liubá.

Segundu, VIII Governu bele hatama fali liuhusi Rejimentu PN artigu 94 númeru 1 kona-ba renovasaun inisiativa lejizlativa, maibé dalan ida-ne’e mós la loos, tanba proposta lei ‘não votada’ tanba retira ona, la karese atu hatama fali iha sesaun lejizlativa tuir mai, katak iha tinan 2020 nia laran, VIII Governu labele hatama fali OJE 2020.

“Kolega sira hetan karik dalan seluk ita bele kompleta malu. Karik la hetan, OJE 2020 ne’ebé iha 19 dezembru hatama uluk ona rohan, depois iha 14 janeiru 2020, sei hatama tan rohan hodi kompleta, VIII Governu hatama no PN simu duni. Ne’e katak OJE 2020 ne’e, DE FACTO VIII Governu bele re-entrega no defaktu PN bele simu fali, maibé DE IURE laiha baze legál nein baze konstitusionál. Nune’e, aktu sira-ne’e jurídikamente inválidu (inezistente) no la prodús kualkér efeitu jurídiku”, nia esplika.

Signifika, Jurista ne’e esplika tan, bainhira la hetan dalan legál-konstitusionál ka laiha baze legál-konstitusionál, implika VIII GOVERNU no PN nia aktu ne’e jurídika-konstitusionalmente INAVALIDU (inezistente); tanba, prinsípiu PRIMADO DA LEI artigu 2 númeru 2 KRDTL ne’ebé sai prinsípiu fundamentál ba Estadu Direitu Demokrátiku hodi haruka Estadu atubele atua de’it ‘secundum legem’ katak aktua de’it tuir lei, labele atua ‘contra legem’ katak labele atua kontra lei no labele atua ‘praeter legem’ katak labele haksoit liu lei.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here