Diretór Jerál Pekuária no Veterinária, MAP Domingos Gusmão. Imajen/Florencio Miranda Ximenes.

DILI, 09 janeiru 2020 (TATOLI) – Diretór Jerál Pekuária no Veterinária Ministériu Agrikultura no Peska (MAP), Domingos Gusmão, husu ba populasaun iha territóriu tomak atu labele ta’uk konsome na’an fahi tanba peste suína afrikana (ASF, sigla inglés) kuaze laiha ona.

“Ha’u fó mensajen ida ba inan-aman sira no komunidade tomak ne’ebé mak iha Timór laran tomak katak na’an fahi ikus ne’e bele konsume ona tanba virus ASF ne’e laiha ona”, Diretór Jerál ne’e ba TATOLI iha knaar fatin Komoro, ohin.

Nia observa abitante sira maioria trauma tanba uluk fahi mate barak no balun soe arbiru ida ne’e mak hata’uk sira atu han na’an fahi ne’ebé kauza husi virus ASF, maibé tuir loloos la afeta ba saúde tanba moras ida ne’e afeta husi fahi ba fahi de’it, la’ós fahi ba ema.

“Fahi ne’ebé mate tanba virus ASF ne’e tuir loos bele han, maibé nia sabór mak la di’ak”, katak.

MAP hala’o prevensaun hamutuk ho nasaun parseira sira hanesan Austrália no Organizasaun Saúde Animál Mundiál sira halo diagnóstika no teste laboratóriu hatudu moras ne’e kuaze atu laiha ona.

MAP observa na’an fahi ne’ebé fa’an iha merkadu no supermerkadu sira ne’e ema ta’uk atu sosa no han inklui iha festa ruma, ema haree liu de’it.

“Ne’e hatudu katak ema hotu-hotu ta’uk haan na’an fahi, maibé iha ne’e ha’u nia apelu katak daudaun ne’e bele han ona no laiha impaktu ona husi moras ASF”, nia apela.

MAP seidauk halo sosializasaun, maibé depois dadus no diagnóstika sira ne’ebé agora ekipa task force halo liuliu peskiza laboratóriu ne’e ajusta hotu tiha, haree mak hahú sosializa atu ema labele ta’uk han na’an fahi.

MAP mós lansa ona na’an fahi di’ak no tau sticker hodi fa’an iha Loja Agrikultór iha Timor Plaza no Fatuhada atu públiku bele sosa no konsome tanba liuhusi inspesaun médiku veterináriu.

Na’an fahi sira ne’ebé fa’an iha loja no supermerkadu sira ne’e kompeténsia Autoridade Inspesaun no Fiskalizasaun Atividade Ekonómika no Sanitária (AIFAESA) niaa atu halo inspesaun, maibé fahi ne’ebé oho husi agrikultór sira bele han.

Notísia relevante : MAP Garante Virus ASF La Mosu iha 2020

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here