Reprezentante Garuda Group iha Timor-Leste, Fernando da Silva. Imajen/ Tatoli Egas Cristovão

DILI, 09 janeiru 2020 (TATOLI) – Jerente Aviaun Citilink, Fernando da Silva, hateten Governu presiza harii empreza aérea nasionál, nune’e Timor-Leste bele korresponde ba folin billete aviaun nian.

“Se bele, Governu hahú ko’alia ho setór privadu atu ita hahú harii ita-nia empreza nasionál airlines. Ha’u sente ne’e todan no lori tempu más, se ita lakohi bainhira”, Fernando haktenik ba jornalista sira hafoin remata enkontru ho Ministru Transporte no Komunikasaun, José Agostinho da Silva, iha salaun Ministériu Transporte no Komunikasaun, Kaikoli, ohin.

Nia dehan bainhira Timor-Leste iha empreza rasik maka foin bele rezolve folin tíkete tanba hein fó presu, nune’e mós aviaun sira bele uza Timor-Leste nia bandeira nasionál hafoin halo operasaun.

“Ida ne’e bele rezolve folin tíkete, kuandu ita iha empreza airlines rasik maka ita hein fó presu tikete, nune’e aviaun bele uza ita-nia bandeira nasionál hafoin halo operasaun”, dehan.

Maibé, atu harii kompañia aérea, Governu tenke koopera ho setór privadu sira atu investe, atubele kontrata empreza hosi Indonézia hodi halo manutensaun ba aviaun, nune’e mós parte Austrália mós bele kapasita empreza timoroan iha área aviasaun nian.

Ministru Transporte no Komunikasaun, José Agostinho da Silva. Imajen/ Tatoli Egas Cristovão.

Hatán ba kestaun ne’e, Ministru Transporte no Komunikasaun, José Agostinho da Silva, hateten Governu prontu atu apoiu ideia konstrutivu husi se de’it atu diskute no buka solusaun ba ida ne’e.

Tanba ne’e, iha tinan kotuk ministru fó ona oportunidade ba timoroan sira ne’ebé maka durante ne’e serbisu iha transporte aéreu atu aprezenta mai Governu kona-ba planu ruma oinsá maka Timor- Leste iha aviaun rasik.

“Ha’u mós hato’o ohin iha ha’u nia intervensaun ho reprezentante aviasaun sira iha Timor-Leste katak Governu prontu tulun ba planu sira ne’e”, re afirma.

Iha parte seluk, Jerente Aviaun Citilink, Fernando da Silva, hatete durante Natál no tinan foun, pasajeiru aviaun Citilink no Sriwijaya menus, maski operasaun aviaun la’o normál.

“Operasaun Citilink durante ne’e la’o normál, maibé pasajeiru maka menus, ema ladún iha atu sa’e, tanba kauza husi ita-nia situasaun polítika”, dehan.

Nia kompara, iha tinan hirak liubá bainhira tama ba Natál no tinan foun, ema halo movimentasaun Dili bá Denpasar makaas tebes, maibé tinan agora pasajeiru ladún.

“Uluk, ita haree Xina sira maka mai barak no maluk sira seluk ne’ebé halo investimentu iha ne’e, maibé agora ema mai menus hosi ema na’in-100”, konklui.

Iha fatin hanesan, Jerente Sriwijaya, Dilham Wahyudi, hateten pasajeiru Sriwijaya nian iha Natál no tinan foun mós ladún iha, dalaruma pasajeiru to’o de’it 60.

Notísia relevante : Governu Sei Reúne ho Ajénsia Travel Hodi Haree Presu Billete Aviaun Ne’ebé Karun

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here