Sekretáriu Estadu ba Komunikasaun Sosiál Merício Juvinal dos Reis 'Akara'. Imajen/Egas Cristovão

DILI, 09 janeiru 2020 (TATOLI) – Sekretáriu Estadu Komunikasaun Sosial, Merício Juvinal dos Reis ‘Akara’, hateten Governu komprometidu kontinua apoiu asosiasaun jornalista hotu iha Timor-Leste.

“Governu kontinua apoiu ita nia asosiasaun jornalista sira, tanba ida ne’e mak polítika VIII Governu Konstitusionál nian programa. Nune’e, ami mós husu ba asosiasaun jornalista sira atu kontinua halo sira nia planu asaun no planu estratejia nian ba oin atu Governu bele apoiu,” dehan Akara iha Palásiu Governu, kinta ne’e.

Nune’e, Governante ne’e husu ba asosiasaun jornalista hotu tenke hodi kontribui mós ba programa hasa’e kapasidade ba joven, liu-liu ba jornalista sira iha rai laran.

Iha parte seluk, polítika Sekretaria Estadu Komunikasaun Sosiál (SEKOMS) nian mós ba oin hakarak fó formasaun ba jornalista sira iha rai-laran de’it.

“Governu nia planu ba oin atu fó formasaun ba jornalista sira, sei hala’o de’it iha rai-laran no sei la ba rai-li’ur. Bainhira ita la konsege hetan fasilidade di’ak hodi aprende mak bele ba rai-li’ur”, dehan Merício.

Jornalista: Hortênçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here