Ministra Finansa en-ezersísiu, Sara Lobo Brites. Imajen/TATOLI.

DILI, 09 janeiru 2020 (TATOLI) – Ministra Finansa ein funsaun, Sara Lobo Brites, konfirma katak Governu liuhusi Ministériu Finansa entrega livru foun proposta Orsamentu Jerál Estadu (OJE) 2020 ho montante biliaun $1,668 ho formatu dijitál ba Parlamentu Nasionál iha 29 dezembru 2019.

Livru orsamentu ho forma dijitál MF submete hafoin entrega uluk proposta OJE 2020 iha 19 dezembru 2019.

Ministra Finansa interina klarifika asuntu ne’e relasiona ba ejijénsia membru PN katak seidauk hetan livru foun ba proposta OJE 2020 nian.

“Kona-ba deputadu sira seidauk iha livru ne’e ha’u hanoin internál Parlamentu Nasionál nian tanba Governu tuir kompromisu ne’ebé ami halo ho Prezidente Parlamentu iha 19 dezembru 2019 kuandu ami entrega proposta lei OJE 2020 konfirma kedas katak iha 29 dezembru ami entrega tan livru orsamentu iha forma dijitál iha USB hamutuk 65 ho livru ezemplár 10 (livru 1 to’o 6”, Sara Lobo Brites dehan.

Atuál Vise-Ministra Finansa ne’e esklarese liután Governu entrega livru proposta lei OJE ne’e ho hanoin katak Parlamentu sei distribui ba bankada ida-idak no hatutan ba membru sira.

“Maibé ami halo audiénsia ho Komisaun C trata asuntu finansa publika iha loron 6 janeiru tinan ne’e, deputadu sira reklama katak sira laiha livru, entaun iha loron ne’e kedas iha parte lokraik ami entrega tan livru ezemplu tolu no loron tuir tan ami entrega kompleta ba iha Parlamentu”, katak.

Tanba ne’e, Sara Lobo Brites salienta livru iha hotu ona Parlamentu, maibé distribuisaun maka seidauk to’o iha deputadu sira entaun ne’e kestaun internál PN nian.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here