Deputadu Partidu Demokrátiku, Adriano do Nascimento. Imajen Tatoli/Egas Cristovão.

DILI, 09 janeiru 2020 (TATOLI)—Membru Komisaun E Parlamentu Nasionál trata Asuntu Infraestrutura, Deputadu Adriano do Nascimento, fó-sai katak diretór balun hosi Ministériu Transporte no Telekomunikasaun (MTK) husu deputadu sira atu hatama proposta adisionál ba Orsamentu Jerál Estadu (OJE) 2020.

“Ministériu Transporte no Telekomunikasaun nia orsamentu iha Kapitál Menór zero. Agora, diretór ida husu fali deputadu sira se bele halo proposta hatama fali. Ne’ebé, ha’u dehan, ita-boot nia ministru mak sai membru Komité Revizaun Orsamentu nível Polítika. Ha’u mós husu ba Ministru José Agustinho, nusá mak ita-boot dasa mamuk tiha ita-boot nia uma laran, depois diretór sira husu ami mak hatama fali”, dehan nia ba Agência TATOLI iha resintu Parlamentu Nasionál, kinta ne’e.

Nia argumenta, proposta orsamentu 2020 ne’e boot liu ne’e mak Governu deside retira, agora Governu redús tiha ona, Governu labele husu tan adisionál ba Parlamentu.

“Ha’u hateten ba Ministru Transporte no Telekomunikasaun, se ami hasa’e to’o biliaun $1.9, deputadu sira vota kontra fali halo nusá, entaun laiha lójika. Ami haruka imi hatún, imi husu ami hasa’e fali. Loloos ne’e diretór husu ministru mak hasa’e”, nia tenik.

Entretantu, proposta foun MTK nian hamutuk millaun $10,787 (antes ne’e millaun $21,747,398), kompostu hosi Saláriu no Vensimentu millaun $1,496 (mantein), Bens no Serbisu millaun $5,499 (antes ne’e millaun $6,999), Transferénsia Públika ko’a hotu (antes ne’e millaun $1), Kapitál Menór ko’a hotu (antes ne’e millaun $1), Kapitál Dezenvolvimentu millaun $3,792 (antes ne’e millaun $11,253).

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here