Sekretáriu Estadu Komunikasaun Sosiál, Merício Juvenal dos Reis Akara, hala'o audiénsia ho Komisaun G kona-ba Orsamentu Jerál Estadu 2020 iha Parlamentu Nasionál. Imajen Tatoli/Egas Cristóvão

DILI, 08 janeiru 2020 (TATOLI)—Komité Revizaun Orsamentu nível Polítika (KROP) redús orsamentu ho montante $627.000 hosi proposta inísiu millaun $6,575 ne’ebé atribui ba Sekretaria Estadu Komunikasaun Sosiál (SEKOMS).

Proposta orsamentu foun 2020 hosi SEKOMS, hamutuk millaun $5,948 (antes ne’e millaun $6,575), kompostu hosi saláriu no vensimentu $770.000 (mantein), Bens no serbisu millaun $1,377 (antes ne’e millaun $1,869), transferénsia públika millaun $1,753 (antes ne’e millaun $1,888), kapitál menór $50.000 (mantein) no kapitál dezenvolvimentu millaun $1,998 (mantein).

Hosi proposta foun millaun $5,948 ne’e fahe ba diresaun neen (6), Gabinete SEKOMS hetan $681.000, Diresaun Diseminasaun Informasaun hetan $945.000, koloka ba Sentru Rádiu Komunitária millaun $2,406, Sentru Formasaun no Téknika Komunikasaun hetan $382.000, Agência TATOLI, I.P. hetan $533.000 no RTTL, E.P. hetan millaun $1.

Hosi proposta foun ne’e kategoria orsamentál ne’ebé sofre redusaun mak bens no serbisu $492.000 no transferénsia públiku sofre redusaun $135.000.

Sekretáriu Estadu Komunikasaun Sosiál, Mericio Akara, hateten progresu ezekusaun orsamentu 2019 nian oras ne’e atinje ona pursentu 92.5.

Maski ezekusaun di’ak, maibé SEKOMS mós konkorda kontribui halo redusaun ba kategoria bens no serbisu no transferénsia públika hamtukuk $627.000.

“Maski ami-nia taxa ezekusaun sa’e, maibé ita hanoin kontribui ba redusaun. SEKOMS nakloke ba mudansa no konkorda atu kontribui ba redusaun. Ne’e duni, ami kumpre no redús iha kategoria bens e servisu hamutuk $492.000 no transferénsia públika $135.000”, Merício Akara informa liuhosi audiénsia públika, iha plenária Parlamentu Nasionál, kuarta ne’e.

“Maibé ba transferénsia públika, ami propoin atu mantein montante inisiál millaun $1,753 ne’e, ho razaun katak kategoria ne’e benefísia direta ba órgaun tutela–millaun $1 ba RTTL, $533.000 ba Agência TATOLI no mós Rádiu Komunidade hamutuk 17 iha munisípiu hotu inklui RAEOA hamutuk $144.000”, nia esplika tan.

Programa prinsipál SEKOMS ba 2020

Tuir Proposta Lei Orsamentu Jerál Estadu (OJE) 2020, medida prinsipál SEKOMS 2020 nian mak hanesan garante liberdade expresaun no asesu ba informasaun liuhosi intensifikasaun produsaun no diseminasaun informasaun ba komunidade hotu, espesialmente komunidade iha área rurál. Daruak, kriasaun no estabelesimentu baze legál ba promosaun no protesaun ba liberdade imprensa, liberdade expresaun no asesu informasaun ho kualidade.

Datoluk, apoia funsionamentu no fortalesimentu diversu órgaun Komunikasaun Sosiál, kriasaun no funsionamentu Institutu Formasaun Jornalista, kriasaun no garantia funsionamentu sentru informasaun ba suku sira iha área rurál, fomentu parseria estratéjiku para apoia realizasaun programa ho kualidade iha área komunikasaun sosiál no promosaun lejizlasaun kona-ba rádiu difuzaun iha Timor-Leste, lei informátika no tranzasaun eletrónika.

Medida prinsipál seluk mak garantia kontinuidade kontrusaun edifísiu TVTL no TATOLI, promove boa governasaun no halo jestaun institusionál iha SEKOMS.

Hakarak fó hanoin katak totál despeza OJE 2020 mai hosi fonte funsionamentu lima (5), hanesan Transferénsia Fundu Petrolíferu, Reseita Naun Petrolífera, Doasaun, Empréstimu no saldu Konta Tezouru.

Purtantu, transferénsia fundu petrolíferu iha oin rua, Rendimentu Sustentável Estimadu no Tranferénsia Superiór ba Rendimentu Sustentável Estimadu.

Reseita naun petrolíferu mai hosi impostu direta, impostu indireta, reseita no taxa seluk, taxa no encargos, jurus konta hosi tezouru no reseita própria hosi Serbisu no Fundu Autónoma (SFA).

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here