Vise-Ministru Obra Públika, Nicolau Lino Freitas Belo. Imajen/Antonio Goncalves.

DILI, 08 janeiru 2020 (TATOLI) – Ministériu Obra Publika (MOP) prevee millaun $166,4 iha proposta Orsamentu Jerál Estadu (OJE) 2020 hodi selu kombustivel no  halo manutensaun ba jeradór sira iha sentrál elétrika rua, Hera no Betanu.

Montante ne’e inklui manutensaun ba torre tranzmisaun elétrika (150KW) no sub-estasaun (20KW) iha lokalizasaun esensiál hitu (N117, N31, N71, N72, N15, N24, N34, no N76).

Orsamentu ne’e prevee iha orsamentu MOP iha kategoria bens no servisu ho totál millaun $195,259.

Vise-Ministru Obra Publika, Nicolau Lino Freitas Belo, hateten osan ne’ebé prevee ne’e hodi sosa kombustivel no manutensaun ba jeradór sira liuliu iha tempu udan.

“Iha orsamentu 2020 nian, ami koloka orsamentu operasaun no manutensaun ba iha eletrisidade nian no totál orsamentu MOP nian iha 2020 nian boot liu maka ba iha kombustivel, jeradór iha Hera no Betanu pur volta millaun $142 (husi millaun $166,4), maibé ba iha operasaun no manutensaun ninian liuliu ba transmisaun hosi kompañia internasionál ne’ebé Governu kontrata atu halo manutensaun ba liña transmisaun sira”, Vise-Ministru informa hafoin halo audiénsia ho Komisaun C trata asuntu finansa públika, iha Parlamentu Nasionál, ohin.

Governante ne’e hatutan, ba iha operasaun no manutensaun Governu kontrata empreza lokál sira ne’ebé responsabiliza ba iha área manutensaun liuliu tempu udan problema téknika iha terrenu karik uza orsamentu manutensaun ne’e bele responde, nune’e populasaun bele asesu ba eletrisidade normál iha époka udan.

Durante ne’e, empreza rua maka fornese kombustivel mak kompañia SACOM Energy fornese ba sentrál elétrika Betanu no Esperansa Timor Oan (ETO) ba sentrál Hera.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here