Sekretariu Estadu Asuntu Kombatantes no Libertasaun Nasionál, Gil da Costa Monteiro "Oan Soro". Imajen/Eugénio Pereira

DILI,08 janeiru 2020 (TATOLI)-Ministériu ba Asuntu Kombatente no Libertasaun Nasionál dadaun ne’e halo ona redusaun osan ba tinan 2020,  iha kategoria tolu hanesan bens servisu, tranferénsia públika no saláriu vensimentu.

Ministru Interinu atuál Sekretáriu Estadu Asuntu Kombatente Libertasaun Nasionál, Gil da Costa ‘Oan Soro’ hateten, MACLN ninia proposta orsamentu antes ne’e prevee millaun $ 104.358 ne’ebé aloka ba  saláriu vensimentu rihun $ 677, bens servisu millaun $ 7.128, tranferénsia públika millaun $ 93.565, kapitál menór rihun $ 551 no kapitál dezenvolvimentu millaun $ 2.416.

Maibé iha proposta foun, Komisaun Revizaun Orsamentu Polítika (KROP) redús ba millaun $ 101.008 hodi ezekuta ba saláriu vensimentu rihun $ 575, bens servisu millaun $ 6.040, tranferénsia públika millaun $ 91.426, kapitál menór rihun $ 551 no kapitál dezenvolvimentu millaun $ 2.416.

“Ita iha redusaun ba milliaun 101.008 tanba ne’e halo mudansa balun hodi hasai orsamentu ba ba item rejime foun distribuisaun bolsa estudu ba veteranu nia-oan nomos pensaun ba sobrevivente no martir sira,”informa Oan Soro ba Jornalista sira hafoin remata audénsia públika ho Komisaun F ne’ebé trata asuntu saúde, seguransa, sosiál no igualidade jéneru,ohin, iha Parlamentu.

Nune’e mós sei adia planu rekrutamentu  ba funsionáriu foun hodi adia ba tinan oin.

Nia realsa governu tenke hasai item orsamentu ba programa bolsa estudu ba veteranu nia-oan. Tanba Prezidente Repúblika, Francisco Guterres Lú Olo to’o oras ne’e, seidauk promulga dekretu governu ne’ebé antes ne’e halo ona alterasaun.

Tanba tuir Gil da Costa ‘Oan Soro’, katak bainhira Xefe Estadu promulga ona dekretu refere maka governu sei prevee  hikas iha orsamentu 2021.

Tuir planu ministériu nian iha tinan 2020 sei kontinua ezekuta orsamentu ba pensaun veteranu no seluk tan.

Jornalista:Nelson de Sousa

Editór:Francisco Simões

HAKEREK NO HATÁN

Please enter your comment!
Please enter your name here