Sekretáriu Estadu Ambiente, Demétrio do Amaral de Carvalho. Imagen Egas Cristovao.

DILI, 08 janeiru 2020 (TATOLI) – Sekretáriu Estadu Ambiente (SEA), Demétrio do Amaral de Carvalho, hatete proposta orsamentu foun 2020 ba SEA ne’ebé hetan redusaun, la fó impaktu ba planu no programa sira tanba konsege kapitaliza orsamentu husi doadór sira balun atubele taka lakuna sira.

Sekretáriu Estadu Demétrio do Amaral dehan iha proposta orsamentu 2020 antes ho millaun $2,178, maibé ko’a ba millaun $1,847.

Iha proposta uluk, orsamentu SEA ho millaun $2-resin ne’e, iha kategoria saláriu no vensimentu rihun $667 hatún ba rihun $573, bens no servisu millaun $1,462 ba millaun $1,223, transferénsia públika laiha, kapitál menór rihun $49 ba rihun $45 no kapitál dezenvolvimentu la aloka.

“Signifika katak iha redusaun rihun $300-resin”, Demétrio ba TATOLI hafoin audiénsia ho Komisaun D ne’ebé trata asuntu ekonomia no dezenvolvimentu iha Parlamentu Nasionál, ohin.

Nia dehan redusaun orsamentu ne’e akontese iha kategoria saláriu no vensimentu rihun $94, bens no servisu mós ko’a kuaze rihun $200 no kapitál menór rihun $4.

“Ami haree ona katak saláriu no vensimentu bele ko’a tanba ami halo proposta atu halo promosaun internu ba grau no eskalaun funsionáriu 27, ne’ebé orsamentu ba promosaun ida ne’e, maibé depois komunika ho Komisaun Funsaun Públika (KFP) halo redusaun tanba despaxu husi Primeiru-Ministru Oitavu Governu ninian deside atu labele halo rekrutamentu tan”, katak.

Sobre orsamentu husi doadór sira, SEA Demétrio dehan hanesan Fundu Klimátika Verde ka Green Climate Fund (GFC) ninian ne’ebé Timor-Leste hetan hamutuk rihun $595 no Access and Benefit Sharing/Global Enviroment liuliu fundu komisaun asegura biodiversidade nian hamutuk millaun $1,3.

“Ho osan sira ne’e, ami hanoin katak la fó impaktu boot ida ba programa no planu SEA nian iha tinan ne’e”, garante.

Nune’e, nia dehan prioridade ba SEA iha 2020 mak mantein planu no programa Oitavu Governu ne’ebé atribui hamutuk 26.

Maibé iha tinan ne’e, SEA hakarak foku ba programa sanulu, hanesan pre-reziliénsia hasoru mudansa klimátika, konservasaun biodiversidade, kontrola poluisaun, lisensa meiu ambientál ne’ebé efetivu no lais, haluan edukasaun ambientál no reforsa polítika implementasaun zero plástiku no seluk tan.

Redusaun OJE 2020 ne’e mosu hafoin Primeiru-Ministru Taur Matan Ruak deside retira OJE 2020 ho montante biliaun $1,950 ba biliaun $1,668, ne’ebé afeta ba proposta OJE husi ministériu sira seluk inklui SEA.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here