Diretór Jerál Bee no Saneamentu, Gustavo da Cruz. Imajen/Florencio Miranda Ximenes.

DILI, 08 janeiru 2020 (TATOLI) – Diretór Jerál Bee no Saneamentu (DGAS, sigla Portugés) Ministériu Obra Públika (MOP), Gustavo da Cruz, informa progresu estudu viabilidade no pre-viabilidade ne’ebé hala’o husi kompañia internasionál husi Tailándia ho Koreia ba projetu dada bee-moos husi mota Rai-Laku no Gleno, Munisípiu Ermera mai Dili atinje ona porsentu 90.

“Agora daudaun, kompañia sira halo hela submisaun no draft hodi finaliza nia estudu iha fulan oin (fevereiru)”, Diretór Jerál ne’e ba TATOLI iha Parlamentu Nasionál, ohin.

Diretór Gustavo da Cruz adianta ein jerál haree kompañia rua ne’e nia estudu viavel, ne’ebé espera finaliza hodi hatama ezbosu atubele hahú loke ba dezeñu detalladu. “Ita haree husi kuantidade bee iha mota Rai-Laku no Gleno viavel atu dada mai iha Dili”, katak.

Nune’e, empreza rua halo estudu viabilidade ne’e atu haree no analiza estrutura rai ne’e di’ak atu hala’o barrajen hodi prodús bee-moos atu fornese mai iha kapitál.

“Ami asina kontratu ho kompañia rua, atu halo estudu bee iha mota Rai-Laku ho mota Gleno oinsá atu halo barrajen hodi prodús bee-moos atu fornese mai Dili no mós estudu ba kondisaun bee rai nian oinsá ita harii fasilidade hodi retén udan-been atu enxe fali ba ita-nia rai”, dehan.

Governu liuhosi Ministru Obra Públika, Salvador Eugénio Soares dos Reis Pires, mak asina kontratu ho kompañia internasionál husi Tailándia ho Koreia iha 22 agostu 2019 atu halo estudu pre-viabilidade no estudu viabilidade ba projetu dada bee-moos husi mota Rai-Laku no mota Gleno, Munisípiu Ermera mai Dili.

Kompañia ne’e maka Team Consulting Engineer and Management PCL, Thailandia in JV With ATT, Consultations Company Limited, Association With Thailand and in CQ2, Engineering Consultancy ne’ebé konsórsiu họ kompañia Diversu Unipessoal, Lda inklui Donsung Enegineering Co. Ltd, Korea and in Association ne’ebé konsórsiu ho empreza Kai Watu Kmanek Consultant Unipessoal, Lda.

Kompañia internasionál rua ne’e, manán konkursu liuhosi prosesu Komisaun Nasionál Aprovizionamentu (CAN, sigla portugés) ho orsamentu millaun $1, ho durasaun estudu hahú hosi agostu 2019 to’o janeiru 2020 (durante fulan lima) ho distánsia hosi Ermera mai Dili kuaze kilómetru 30-resin.

Antes ne’e, Ministru Salvador esplika planu integradu ba estudu ne’e foku liu ba produsaun bee atu fornese bee ho kualidade no saudavel ba komunidade sira iha Dili. Tanba produsaun bee Dili depende de’it ba perfurasaun ho estasaun 26 husi bee ne’ebé iha rai-okos maibé la sufisiente.

“Ita hanoin estudu viabilidade maka fó rezultadu di’ak, ita bele avansa ba dezeñu enjeñaria detallada atu halo barrajen iha mota Rai-Laku, Postu Administrativu Gleno, Munisípiu Ermera, atu lori bee mai Dili”.

Tanba ne’e, ministru husu ba kompañia nasionál no estranjeira sira ne’ebé halo no konsórsiu atu uza nia abilidade tomak hodi bele ajuda Governu hodi atinje nia objetivu atu fornese bee-moos ba populasaun durante oras 24 oras nia laran.

Sistema produsaun bee iha Dili, kada loron kuaze prodús litru millaun 52 ne’ebé fornese ba populasaun tuir sensu 2015 hamutuk 267.000, distribui bee ba umakain kada loron litru 500, ida ne’e presiza aumenta produsaun bee kada loron litru millaun 40 atu fornese ba abitante sira iha Dili.

Notísia relevante : Governu Kontrata Kompañia Thailándia-Koreia Halo Estudu Dada Bee Husi Ermera Mai Dili

Jornalista : Florencio Miranda Ximenes

Editora : Maria Auxiliadora 

HAKEREK NO HATÁN

Please enter your comment!
Please enter your name here