Sesaun plenária Parlamentu Nasionál. Imajen/Tatoli

DILI, 08 janeiru 2020 (TATOLI) – Iha audiénsia públika komisaun ho entidade relevante sira husi instituisaun Estadu, Bankada Governu sira lamenta membru governu balun ne’ebé auzénsia.

Audiénsia públika Komisaun A ne’ebé trata asuntu Konstituisaun no Sidadania, ho Ministériu Reforma Lejizlativa no Asuntu Parlamentár (MRLAP), Ministru Fidelis Leite Magalhães la partisipa no reprezenta hosi Sekretáriu Estadu Komunikasaun Sosiál, Merício Juvinal dos Reis ‘Akara’ no Diretór Jerál Administrasaun MRLAP, Ponciano da Cruz Leite, nune’e mós parte hosi Ministériu Obra Públika (MOP), Ministru Salvador Pires la marka prezensa no reprezenta hosi Vise MOP, Nicolau Lino Freitas Belo.

Nune’e, ho auzénsia governante na’in-rua ne’e, halo Deputadu Bankada PLP, Sabino Soares ‘Guntur’ kestiona maka’as tanba pedidu diskusaun orsamentu husi parte Governu ho karáter urjénsia, tanba ne’e konsidera ministru sira mak iha kompeténsia esplika razaun redusaun ba deputadu sira.

“Tuir loloos situasaun emerjénsia hanesan fó prioridade liubá problema rai-laran, la’ós lisensa ba rai-li’ur. Estadu ida ne’e dependénsia ba Orsamentu Jerál Estadu maibé kuandu nia la tau importánsia ba orsamentu, ne’e laiha responsabilidade”, dehan Deputadu PLP ne’e  iha resintu Parlamentu Nasionál (PN), kuarta ne’e.

Nia argumenta, ministru ida labele haruka Diretór Jerál mak halo esplikasaun, tanba diretór hanesan ema tékniku, tanba ne’e ministru mak bele fó informasaun kona-ba kategoria no rúbrika orsamentál ne’ebé sofre redusaun ne’e.

“Ha’u nu’udar fundadór partidu PLP no Komisáriu Polítika Nasionál nian, ha’u triste kuandu membru PLP ida envolve iha Governu halai ses hosi responsabilidade, ne’e tristeza boot ida, lisensa mós labele. Bainhira Primeiru-Ministru mak autoriza mós ne’e sala hotu, tanba proposta ne’e Governu mak husu debate ho karáter urjénsia”, Deputadu Guntur kestiona.

Nune’e mós, Deputadu Bankada CNRT, Adérito Hugo da Costa, lamenta auzénsia membru governu balun iha audiénsia públika ne’e.

“Ita lamenta tebes, hatudu nafatin inkonsisténsia tanba membru governu balun tenke hatene ajenda serbisu ho responsabilidade. Maibé bainhira membru governu sira la prienxe audiénsia públika ne’e lamentável tebes”, Deputadu Bankada Governu ne’e subliña.

Deputadu ne’e dehan tan, ein termu serbisu solidariedade intitusionál hatudu ona sinál ladún di’ak tanba deputadu sira halo jestu oin-oin hodi la prienxe korum iha komisaun, enkuantu audiénsia iha komisaun presiza korum.

“Proposta ida agora ne’e la’ós normál maibé ho pedidu karáter urjénsia, tanba ne’e parte sira ne’ebé envolve iha prosesu ne’e tenke koopera didi’ak. Ne’e responsabilidade morál ba orsamentu 2020 nian”, nia salienta.

Adérito haktuir, siklu orsamentu normál ne’ebé aprezenta iha 15 outubru hetan tiha ona perturbasaun no espetativa tama ba tinan foun orsamentu ne’e tenke hetan ona aprovasaun maibé la akontese.

“Ohin ita to’o ona 8 de janeiru foin mak faze audiénsia públika signifika katak ita sei perturba siklus orsamentu normál, tanba ne’e membru governu tenke sensível ho situasaun ne’e”, Deputadu CNRT ne’e fó hanoin.

Deputadu Bankada KHUNTO, Luis Roberto, konsidera auzénsia membru governu hanesan problema Governu nian.

“Bainhira bele karik, ita bazeia ba lei ita iha direitu atu pasa férias, maibé proposta ne’e mai ho karáter urjénsia, membru governu tenke iha responsabilidade partisipa iha audiénsia ne’e”, nia haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here