Polisia Tránzitu sukat hela fatin asidente tráfegu ne’ebé rezulta aman ho oan mate iha área Marconi, Dili, foin lalais ne'e. Imajen/PNTL

DILI, 08 janeiru 2020 (TATOLI)- Durante períodu tinan 2019, Komandu Polisia Nasionál Timor-Leste (PNTL) rejista kazu tráfegu, asidente no insidente ne’ebé akontese iha territóriu  Timor-Leste  rezulta ema na’in 68 mate no na’in 342 sofre kanek todan.

Adjuntu Xefe Departamentu Tránzitu no Seguransa Rodoviáriu Nasionál Inspetór Polisia, Afonso da Silva, relata dadus estatístika kazu asidente hotu iha 2019 rejista ho númeru 1.440.

“Totál asidente ne’e rejistu too ohin loron rezulta kanek todan na’in 342 no na’in 68 maka lakon vida,” dehan Afonso ba jornalista, hafoin fó formasaun ba ajente seksaun tránzitu no Ofisial Polisia Suku (OPS) ho forsa rezerva polisia kona-ba knaar servisu atu halo atuasaun iha terrenu ba motorista sira ne’ebé viola lei kódigu estrada iha salaun enkontru Komandu Polisia, Caicoli, Dili, kuarta (08/01/2020).

Iha relatóriu PNTL bainhira halo identifikasaun ba asidente no insidente sira ne’ebé akontese maioria kauza husi konxiénsia umanu uza transporte la kontrolu-an no halai karreta no motór ho velosidade.

“Asidente sira ne’e kauza mai husi ema rasik, tanba ita laiha konxiénsia la kuidadu-an, dala ruma lanu, halai velosidade makas liu, dala ruma kontra sinais entaun hetan asidente,” Afonso tenik.

Komandu PNTL mós halo komparasaun ba asidente 2019 ki’ik liu, bainhira kompara ho dadus tinan 2018 ne’ebé PNTL rejista no halo atendimentu ba akontesimentu no asidente hamutuk 1.712.

Husi asidente tránzitu  2018 nian ne’e rezulta ema na’in 368 kanek todan, na’in 421 kanek kaman  no na’in 72 lakon vida

Natál no Tinan Foun, Ema Na’in 7 Mate

Iha periodu natál no tinan foun hahú husi loron 24 dezembru 2019 to’o loron 5 janeiru 2020, PNTL mós rejista kazu asidente no insidente hamutuk 175 no na’in hitu (7) mak mate.

Nia hatutan, iha loron 02 janeiru 2020, mosu insidente iha Munisípiu Liquiça rezulta labarik feto na’in rua  no mane na’in ida mate, agora iha loron 05 insidente mosu iha Same bainhira katuas ida atu sai ba kasa entaun nia tenta atu oho fahi fuik, maibé fahi seidauk mate, fahi tata fali katuas ne’e too mate fatin.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here