Sekretáriu Estadu Juventude no Desportu, Nélio Isaac Sarmento. Imajen Tatoli/Egas Cristóvão

DILI, 07 janeiru 2019 (TATOLI)–Sekretáriu Estadu Juventude no Desportu, Nélio Isaac Sarmento, hateten orsamentu ne’ebé atu apoiu ba grupu Konsellu Polísiamentu Komunitáriu (KPK) liuhusi proposta Orsamentu Jerál Estadu (OJE) ba Sekretaria Estadu Juventude no Desportu (SEJD) eliminadu no intrega fali ba parte Ministériu Interiór atu haree.

“Programa ne’ebé atu implementa iha tinan agora hanesan apoiu ba KPK ne’e eliminadu tanba iha sirkunstánsia balun entaun programa ne’e la akontese iha 2020. Husik polísia sira mak kontinua ho sira-nia grupu ne’e,” Nélio ba jornalista iha Parlamentu Nasionál, tersa ne’e.

Entretantu, antes ne’e, Governu liuhosi SEJD rasik deklara sei aloka orsamentu hodi apoiu grupu KPK hamutuk millaun $1.5.

“Uluk ita tau osan ba sira hamutuk millaun $1.5 maibé tanba orsamentu redús entaun ita hasai tiha programa ne’e totalmente. Ita redús mós osan sira ne’ebé atu apoiu ba juventude no subsídiu ba klube futeból, liga basketból no voleiból,” nia tenik.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here