Vise-Ministru Obra Públika, Nicolau Lino Freitas Belo. Imajen Tatoli/Egas Cristovão

DILI, 07 janeiru 2020 (TATOLI)–Sekretáriu Estadu Formasaun Profisionál no Empregu (SEFOPE) Interinu, atuál Vise Ministru Obra Públika, Nicolau Lino Freitas, ohin, iha Parlamentu Nasionál, hala’o audiénsia ho Komisaun D trata asuntu Ekonomia no Dezenvolvimentu, hodi konfirma hikas redusaun ba OJE 2020 hamutuk millaun $2 no propoin hikas adisionál millaun $ 1.

Hafoin audiénsia, Nicolau hateten aprezenta primeiru iha fulan dezembru tinan kotuk, ho montante millaun $6.990, no hafoin retira, halo tiha redusaun konsege hetan proposta foun ho montante millaun $ 4.591.

Nia hatutan, redusaun ne’e maka’as liu iha Transferénsia Públika, tanba ne’e SEFOPE propoin nafatin osan adisionál millaun $1 atu bele aloka nafatin iha Transferénsia Públika hodi reforsa sentru formasaun sira, nune’e bele kapasita joven sira asesu kampu serbisu iha rai-li’ur no rai-laran.

“Redusaun orsamentu ne’e maka’as liu iha Transferénsia Públika, tanba ne’e, ita esforsu an atu husu nafatin ba Komisaun D asuntu Ekonomia no Dezenvolvimentu atu aumenta osan adisionál millaun $1, nune’e, bele reforsa sentru formasaun sira hodi forma joven sira asesu kampu serbisu iha rai-laran no rai-li’ur tuir planu SEFOPE, tanba rihun $600 de’it ne’e sei la to’o”,  Nicolau informa.

Kona-ba kestaun ne’e, Vise Prezidente Komisaun D, deputadu Ricardo Baptista haklaken Komisaun propoin atu redús iha Bens Serbisu, Kapitál Menór no Transferénsia Públika no Kapitál Dezenvolvimentu.

Bainhira SEFOPE hakarak atu propoin tan millaun $1, sira bele propoin, naran katak durante debate OJE 2020 iha semana oin, bele konvense maioria deputadu sira atu bele aprova.

“Komisaun D trata asuntu produtivu sira hanesan agrikultura, peska, minerál, petróleu inklui SEFOPE rasik ne’ebé hanesan área ida mak prodús osan ba Estadu. Tanba ne’e, klaru katak ida-idak mai ho ninia pedidu no ezijénsia hakarak aumenta no tau osan, maibé ita mós tenke haree ba importánsia husi setór sira seluk. Nune’e, hakarak ka lakohi, dezenvolvimentu ne’e tenke balansu”, Ricardo esplika.

Entretantu, proposta orsamentu SEFOPE ba tinan 2020 antes ne’e ho montante hamutuk millaun $6.990, kompostu husi Saláriu no Vensimentu millaun $1.250, Bens no Serbisu millaun $ 3.000, Transferénsia Públika millaun $ 2.350, Kapitál Menór rihun $130, Kapitál Dezenvolvimentu rihun $170.

Hafoin ne’e, retira husi Parlamentu Nasionál halo redusaun hamutuk millaun $1.866 no hetan proposta orsamentu foun SEPFOPE hamutuk millaun $4.591, kompostu hosi Saláriu no Vensimentu millaun $1.552, Bens no Serbisu millaun $2.232, Transferénsia Públika rihun $600, Kapitál Menór rihun $137 no Kapitál Dezenvolvimentu rihun $70.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here