Xefe Kaza Sivíl Prezidénsia Repúblika, Francisco Vasconcelos no Espoza Prezidente Repúblika, Cidália Lopez Nobre Mouzinho Guterres hamutuk ho funsionáriu sira, presta omenajen ikus ba fundadora Igreja Protestante iha Timor-Leste, pastora Maria de Fátima. Imajen Mídia PR

DILI, 07 janeiru 2020 (TATOLI)–Xefe Kaza Sivíl Prezidénsia Repúblika, Francisco Vasconcelos no Espoza Prezidente Repúblika, Cidália Lopez Nobre Mouzinho Guterres hamutuk ho funsionáriu sira, tersa ne’e, iha Balide, Dili, presta omenajen ikus ba fundadora Igreja Protestante iha Timor-Leste, pastora Maria de Fátima Wadhoomall Gomes.

Pastora Maria de Fátima Wadhoomall Gomes moris iha Dili, 25 fevereiru 1940. Iha tempu kolonializasaun Portugés hahú koñese Cabo Verdiano sira ne’ebé serbisu nu’udar funsionáriu hodi haklaken doutrina protestante ninian. Maibé, liuhusi nia koñese pastór sira husi Estadu Unidu Amerika, Edward Dilman no Rud Dilman, Maria Gomes nu’udar timoroan ne’ebé sai sarani dahuluk Igreja Protestante ninian iha tinan-1950 nia laran.

Transladasaun fundadora Igreja Protestante iha Timor-Leste, pastora Maria de Fátima. Imajen Mídia PR

Evanjelizasaun katólika ne’ebé mai hamutuk ho kolonializasaun Portugés ladún fó fatin ba dezenvolvimentu Igreja Protestante iha Timor-Leste. Sarani protestante sira moris iha sélula ki’ik de’it. Tanba ne’e, Pastora Maria Gomes hamutuk ho nia kaben José Agusto Seabra Gomes hahú evanjelizasaun iha illa Ataúro. Husi Ataúro, Asembleia de Deus habelar ba rai sira seluk, hanesan Same, Baguia no Baucau.

Okupasaun Indonézia ne’ebé rekoñese relijiaun lima, Katóliku, Protestante, Islam, Budha no Hindu loke oportunidade liu ba Pastora Maria Gomes atu habelar Asembleia de Deus iha Timor laran tomak.

Iha tinan-1978, Pastora Maria Gomes hamutuk ho nia kaben halo renovasaun ba fiar sarani sira iha Ataúro atu fiar Maromak de’it.

Iha tinan-1979, hamosu Igreja Protestante Timor-Lorosa’e (IPTL) ne’ebé formaliza iha 1988. Ho prezensa Indonezia ninian, moris tan Igreja Protestante sira seluk hanesan Hosana no Evangélica.

Pastora Maria Gomes hakotu iis iha Hospital Nacional Guido Valadares (HNGV), 7 janeiru 2020.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here