Logo Sekretaria Estadu Juventude no Desportu (SEJD)

DILI, 07 janeiru 2019 (TATOLI)–Diretór Nasionál Desportu Sekretaria Estadu Juventude no Desportu (SEJD), João Rodrigues, haktuir preparasaun ba jogu Komunidade Ko’alia Lian Portugés (CPLP-sigla Portugés) daudaun ne’e la’o hela.

“Preparasaun ba atu realiza jogu CPLP ne’e la’o namanas hela. Hanesan reabilitasaun ba Jináziu Dili no kampu Voleiból Praia kuaze atinje pursentu 27 ba leten ona. Tempu besik mós ita sei halo kontinuasaun reabelitasaun ba Estádiu Dili. Fiar katak sei la’o ho di’ak,” João hateten iha Parlamentu Nasionál, tersa ne’e.

Nia dehan, loron 24 fulan ne’e, ekipa tékniku ba jogu CPLP sei mai vizita Timor-Leste hodi haree diretamente preparasaun Timor-Leste nian ba realizasaun jogu ne’e.

“Daudaun ne’e Governu mós forma namanas hela komisaun organizadora atu organiza jogu CPLP ne’e. Maibé, ita hein to’o 24 janeiru agora komisaun tékniku sira mai haree oinsá mak foin ita halo serbisu ho másimu ba jogu ne’e rasik,” nia tenik.

João subliña, relasiona fatin ba atleta husi internasionál sira atu hela, daudaun ne’e parte komisaun vizita ona otél iha Dili laran hamutuk 15 ne’ebé kondisaun sufisiente ona.

Jogu ne’e sei partisipa hosi nasaun 9 ne’ebé hamahan an iha organizasaun CPLP. Jogu refere sei realiza iha 12-22 jullu 2020.

Enkuantu, orsamentu ne’ebé aloka ba jogu ne’e rasik parte tékniku SEJD propoin tokon 2 resin.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here