Xefe Kaza Sivíl Prezidénsia Repúblika, Francisco Maria de Vasconcelos. Imajen/Mídia PR

DILI, 07 dezembru 2020 (TATOLI) – Prezidente Repúblika (PR), Francisco Guterres Lú Olo hetan konvite hodi partisipa seremónia tomada pose Prezidente Moçambique foun, Filipe Jacinto Nyusi, ne’ebé sei realiza iha loron 15 janeiru tinan ne’e.

 Maibé ho razaun Xefe Estadu labele partisipa iha seremónia ne’e, Xefe Kaza Sivíl Prezidénsia Repúblika, Francisco Maria de Vasconcelhos hasoru malu ho Primeiru-Ministru (PM), Taur Matan Ruak, hodi koordena kona-ba reprezentasaun Timor-Leste iha seremónia ne’e.

“Ohin ha’u mai hasoru malu Primeiru-Ministru tanba Prezidente Repúblika husu ha’u atu mai ko’alia kona-ba oinsá Timor-Leste atu ba partisipa seremónia tomada pose Prezidente foun Moçambique”, tenik Vasconcelhos iha Palásiu Governu, tersa ne’e.

Nune’e, Xefe Kaza Sivíl dehan sorumutuk ohin ho Xefe Governu hodi koordena reprezentasaun Timor-Leste iha seremónia ne’e, hafoin informa fila-fali ba PR Olú Olo.

Tuir nia, Xefe Estadu labele partisipa tanba iha férias nia laran no bainhira PR sai presiza autorizasaun hosi Parlamentu Nasionál (PN), enkuantu daudaun ne’e iha hela diskusaun orsamentu nia laran.

Vasconcelhos haktuir, ohin PM Taur seidauk deside maibé sei komunika ho Prezidénsia Repúblika iha tempu besik.

“Primeiru-Ministru dehan ami sei hasoru malu fali aban ka bain-rua hodi halo koordenasaun”, nia akresenta.

Jornalista: Hortênçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here