Diretór Jerál Adiministrasaun MRLAP, Ponciano da Cruz Leite. Imajen/Egas Cristovão

DILI, 07 janeiru 2020 (TATOLI) – Iha orsamentu tinan fiskál 2020 ba Ministériu Reforma Lejizlativa no Asuntu Parlamentár (MRLAP) ne’ebé antes ne’e ho montante millaun $2,087, hafoin halo ajustamentu iha proposta foun hetan redusaun $281.000, nune’e montante atuál millaun $1,806.

Diretór Jerál Administrasaun MRLAP, Ponciano da Cruz Leite, hateten proposta foun ne’e redúz maka’as liu iha kategoria kapitál menór, bens no serbisu no transferénsia públika.

“MRLAP halo redusaun $281.000, ein prinsípiu husu ko’a iha servisu profisionál ne’ebé selu ba funsionáriu no asesór sira, maibé ohin ami defende katak ami la ko’a iha servisu profisionál sira, maibé hasai osan hosi viajen lokál, viajen estranjeiru, materiál eskritóriu no fornesimentu operasionál”, informa Ponciano hafoin audiénsia públika ho Komisaun A (trata asuntu Justisa no Konstitusionál), tersa ne’e.

Kategoria kapitál menór antes ne’e prevee $349.000, hafoin redusaun hela de’it $70.000, transferénsia públika antes ne’e millaun $2,169, hela de’it millaun $1,753, kategoria bens no serbisu antes ne’e millaun $3,276, agora hela millaun $2,820.

Diretór ne’e haktuir, loloos kada tinan karater orsamentu ne’e sa’e, maibé orsamentu tinan fiskál 2020 kompara orsamentu 2019 redúz pursentu 7.

 “Entaun ne’e hatudu katak serbisu balun la’o tuir de’it orsamentu ne’ebé mak iha”, nia akresenta.

Ponciano realsa, prioridade MRLAP ba 2020 mak reforma lejizlativa, reforma judisiária, inovasaun serbisu administrasaun públika no mós reforma ba lei sira.

Iha proposta foun, Gabinete Reforma Judisiária prevee orsamentu $86.00, Gabinete Reforma Lejizlativa $142.000, enkuantu Gabinete Inovasaun Administrativa $179.000.

Proposta Orsamentu Jerál Estadu (OJE) 2020 foun hosi MRLAP, inkluindu Sekretaria Estadu Komunikasaun Sosiál (SEKOMS) hamutuk millaun $7,753 (antes ne’e millaun $6,990), kompostu hosi saláriu no vensimentu millaun $1,112 (antes ne’e millaun $1,196), bens no serbisu millaun $2,820 (antes ne’e millaun $3,276), transferénsia públika millaun $1,753 (antes ne’e millaun $2,169), kapitál menor $70.000 (antes ne’e $349.000) no kapitál desenvolvimentu millaun $1,998.

Enkuantu, proposta foun MRLAP ekslui SEKOMS hamutuk millaun $1,806 (antes ne’e millaun $1,892), kompostu hosi saláriu no vensimentu $343.000 (antes ne’e $341.000), bens no serbisu millaun $1,443 (antes ne’e millaun $1,421), kapitál menor $20.000 (antes ne’e $130.000), laiha kapitál dezenvolvimentu no transferénsia públika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here