Jardim 12 Novembro Motael muda naran ba Sebastião Gomes. Imajen/António Gonçalves.

DILI, 07 janeiru 2020 (TATOLI) – Ministériu Turizmu, Komérsiu no Indústria (MTKI) hein hela aprovasaun Orsamentu Jerál Estadu (OJE) 2020, atu muda naran jardín 12 de Novembro Motael ba Sebastião Gomes.

“Ohin, ami iha komisaun D mós kestiona kona-ba muda naran jardín 12 de Novembro Motael ba jardín Sebastião Gomes. Ami responde iha prosesu hela ne’ebé iha tinan ne’e ka orsamentu OJE 2020 aprova ona komesa ita haree ona para hahú buka solusaun”, Diretór Jerál Turizmu MTKI, José Filipe Dias Quintas, afirma hafoin akompaña Ministru Estadu Koordenadór Asuntu Ekonómiku halo audiénsia ho Komisaun D ne’ebé trata asuntu ekonomia no dezenvolvimentu, iha Parlamentu Nasionál, ohin.

Nia dehan daudaun ne’e, halo koordenasaun nafatin ho Ajénsia Dezenvolvimentu Nasionál (ADN) no Komité 12 Novembru liuliu Prezidente Komité, Gregório Saldanha, atu rezolve ona preokupasaun públiku liuliu muda naran jardín ne’e.

Hatán karik presiza orsamentu adisionál, nia dehan konserteza tanba projetu saida de’it mak halo bazeia ba bill of quantities (BoQ), maibé kuandu iha mudansa ba BoQ ne’e presiza adisionál ruma.

“Teknikamente ha’u labele esplika orsamentu adisionál hira tanba buat sira ne’e aprova no kuandu konstrui ona mak foin ita bele ko’alia”, katak.

Maibé, José Quintas dehan muda naran jardín 12 de Novembro Motael ba Sebastião Gomes, presiza konsulta didi’ak ho Komité 12 Novembru (K12N) no família, hafoin bele muda hodi lalika repete fali fallansu ne’ebé iha ona.

“Ita rekoñese ne’e fallansu tékniku uitoan, ne’ebé presiza hadi’a para futuru ita labele repete tanba intensaun husi Ministériu Turizmu laiha intensaun polítika, maibé serbisu profisionál hakarak promove sítiu turizmu, mas fallansu ami mós rekoñese ami-nia iha koordenasaun”, katak.

Antes ne’e, Prezidente K12N, Gregório Saldanha, sente triste ho promesa Governu ne’ebé atu muda naran jardín 12 de Novembro ba Sebastião Gomes, maibé to’o oras ne’e seidauk realiza.

Iha loron 17 setembru, ekipa K12N hasoru malu ho Ministru Turizmu, Komérsiu no Indústria interinu, Fidelis Manuel Leite Magalhães, hodi hato’o preokupasaun Komité kona-ba naran ba jardín Motael, nune’e, iha momentu ne’ebá ministru orienta ona ekipa téknika ministériu atu koordena ho kompañia ne’ebé kaer obra hodi bele muda naran ba jardín 12 de Novembro Motael” ba Sebastião Gomes.

Jardín Motael ne’e konstrui husi empreza ALGIS Construction Engineering Lda, ho totál orsamentu $95.000 ho durasaun konstrusaun fulan tolu.

Notísia relevante : Muda Naran Jardín Iha Motael Presiza Konsulta Didi’ak Ho K12N No Família

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here