Turizmu doméstiku, bee-manas Marobo. Imajen Tatoli/António Gonçalves

DILI, 07 janeiru 2020 (TATOLI) – Atu jere Bee Manas Marobo iha Suku Ilat-Laun, Postu Administrativu Bobonaro, Munisípiu Bobonaro, Ministériu Turizmu, Komérsiu no Indústria (MTKI) presiza termu entrega husi Sekretáriu Estadu Formasaun Profisionál no Empregu (SEFOPE).

“Ami hahú ona teknikamente diskusaun ho SEFOPE atu halo termu entrega ida ba MTKI atubele dezenvolve no jere Bee Manas Marobo”, Diretór Jerál Turizmu MTKI, José Filipe Dias Quintas, afirma ba jornalista sira iha Parlamentu Nasionál, ohin.

José Quintas adianta tanba sítiu turístiku sira ne’e SEFOPE mak uluk dezenvolve, entaun presiza termu entrega ho baze ba lei orgánika Governu atu MTKI bele dezenvolve no halo jestaun di’ak liután.

“Ami hato’o ona ba sira (SEFOPE) atu entrega ba ami, tanba ne’e área turizmu nian ho baze ba lei orgánika Governu nian, sítiu sira ne’e Ministériu Turizmu, Komérsiu no Indústria mak iha responsabilidade atu jere”, katak.

Nia dehan la’ós ba Bee Manas Marobo de’it, maibé presiza mós termu entrega ba sítiu sira iha Seloi-Kraik iha Aileu no sítiu Lekiraka (Reki-Raka) iha Viqueque, One Dolar Beach iha Metinaro no ida iha Com, Munisípiu Lautem.

“Ami hein hela para iha tempu badak sira bele fó termu entrega ofisiálmente mai Ministériu Turizmu para ita komesa halo dezenvolvimentu no halo jestaun”, espera.

Tanba Diretór Jerál Turizmu dehan, sítiu ne’e dezenvolve ona, maibé laiha jestaun mak fatin sira ne’e sei abandona no Governu gasta osan saugati de’it.

“Ita presiza jere no investe ona atu ema komesa tama ita haree ba retribuisaun ka komesa selu kuandu ita haree infraestrutura bázika sira komesa di’ak ona”, afirma.

Nia salienta, ema ba hariis ka vizita fatin sira ne’e tenke selu atu hatama reseita no bele hadi’a ka halo manutensaun ba infraestrutura sira.

Antes ne’e, Xefe Suku llat-Laun, Postu Administrativu Bobonaro, Munisípiu Bobonaro, Juvenal Pires Amaral, hateten autoridade komunitária ho joven sira harii ona ekipa jestaun ba Bee Manas Marobo, maibé daudaun la funsiona tanba seidauk iha legalidade husi Prezidente Autoridade.

“Ami uluk (2017-2018) hahú fó ona tarefa atu motór ida tama selu $1 no karreta $5, maibé agora paradu tanba ami laiha baze legál. Ami halo regulamentu operasionál ba munisípiu atu aprova, maibé to’o agora seidauk iha resposta”, Xefe Suku ne’e dehan.

Nune’e, Juvenal Dias Ximenes salienta xefe suku tolu iha kompleksu (kompleks) Marobo ne’e tuur hamutuk ona hodi halo regulamentu operasionál no entrega ba Prezidente Autoridade Bobonaro, mas seidauk aprova.

Xefe Suku Ilat-Laun (Foho-Leten) ne’e dehan hahú husi 2017 to’o 2018, kuandu loron boot hanesan Natál no tinan foun inklui finadu bele rekolla reseita $700 to’o $900, mas loron bain-leet dala ruma fulan ida menus husi 100.

Hatán ba kondisaun uma no ekipamentu iha Bee-manas Marobo, autoridade lokál ne’e dehan mós hahú aat.

Entretantu, abitante Ilat-Laun Maria da Cruz dehan Bee Manas Marobo ne’e laiha ema ida mak hein.

“Ita haree abandona de’it ona, ami sira ne’e mak haree ema mai vizita entaun ami mai fa’an sasán ka hahán,” afirma.

Nia dehan besik tinan ida ona Bee Manas Marobo ne’e ema la hein no vizitante tama ho gratuita.

Bee Manas Marobo ne’e, konstrui no reabilita hosi SEFOPE iha 2015 ho valór orsamentu $498,860 no inaugura iha 08 dezembru 2016 husi Ministru Planeamentu no Investimentu Estratéjiku, Kay Rala Xanana Gusmão, no Sekretáriu Estadu Polítika Formasaun Profisionál Empregu (SEPFOPE), Ilídio Ximenes da Costa, iha Sestu Governu Konstitusionál nia tempu.

Notísia relevante : Presiza Jere Bee Manas Marobo Tanba Hahú “Abandona”

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here