Vise-Prezidente Federasaun Muaythai Timor-Leste, José Maria da Silva (Zeka Rápidu). Imajen/Tatoli.

DILI, 07 janeiru 2020 (TATOLI)—Vise-Prezidente Federasaun Muaythai no Mixed Martial Arts (MMA) Timor-Leste, José Maria “Zeca Rapido” da Silva, informa iha Favereiru 2020 ne’e Federasaun Muaythai no MMA Timor-Leste sei realiza kompetisaun nasionál iha Timor-Leste (TL) tuir sira-nia kalendáriu ka planu anuál.

“Iha fulan Fevreiru be mai, Federasaun Muaythai no MMA Timor-Leste sei realiza eventu nasionál ba jogu MMA de’it,” dehan José Maria da Silva, ba Ajénsia TATOLI liuhusi entrevista ne’ebé hala’o iha ninia knaar fatin Eis-Ministériu Justisa, Caicoli, Dili, tersa (07/01/2019).

Nia hatutan, kompetisaun ba jogu MMA ne’e sei loke kategoria ba klase mane no feto. Ba klase mane, tuir nia, sei loke klase lima no ba klase feto mak to’o agora sira seidauk identifika. Maibé, nia informa, kategoria klase mane ne’e hanesan klase primeiru 52 kg, klase segundu 56 kg, klase terseiru 61 kg, klase kuartu 65 kg, no klase kintu 70 kg.

Aleinde ne’e, nia haktuir, iha Jullu 2020 ne’e Federasaun Muaythai no MMA Timor-Leste sei realiza eventu Muaythai Internasionál Fight (luta) ne’ebé sei loke ba klase lima. Tanba, nia dehan, iha Jullu 2020 ne’e loke eventu hamutuk sanulu resin neen ba eventu MMA no Muaythai tuir klase nasionál no internasionál.

“Iha fulan Jullu, ita sei halo kompetisaun Internasionál ba jogu rua mak jogu Mixed Martial Arts (MMA) no Muaythai ne’ebé sei hala’o iha Timor-Leste,” nia dehan.

Kompetisaun International Fight Muaythai ne’e, nia informa, sei partisipa mós kolega Albert Xavier no fighter (lutadór) timoroan sira seluk sei hasoru lutadór internsional sira husi rai li’ur.

“Primeiru, ita tenke buka torneu ida ema dehan Fight lepas. Fight lepas ne’e ita sei buka haree husi sira-nia prontidaun hodi sira joga iha klase ida ne’e ka lae. Fighter ka lutadór sira iha nasionál ne’e ita sei haree fali torneiu sira ne’ebé mak ita loke ne’e halo kompete ba malu mak foin tau nia presu,” nia esplika.

Jornalista : Cancio Ximenes
Editór       : Rafy Belo

HAKEREK NO HATÁN

Please enter your comment!
Please enter your name here