Deputado PD, Mariano Assanami Sabino. Imajen/Egas Cristovão

DILI, 07 janeiru 2020 (TATOLI) – Deputadu Bankada Partidu Demokrátiku (PD), Mariano Assanami Sabino, konkorda desizaun Governu ne’ebé prevee orsamentu boot ba irrigasaun iha Proposta Lei Orsamentu Jerál Estadu (OJE) 2020 foun, tanba konsidera bainhira iha jestaun di’ak ba bee, produsaun bele aumenta.

Iha Proposta OJE 2020 antes Governu retira, orsamentu Ministériu Agrikultura no Peska (MAP) prevee ba Diresaun Nasionál Irrigasaun no Jestaun Utilizasaun ba Bee ho montante millaun $3,492, maibé iha proposta foun, hetan redusaun $516.000, nune’e orsamentu ba diresaun ne’e ho montante $2,976.

“Ha’u konkorda Governu tau osan boot ba irrigasaun, tanba irrigasaun ne’e investimentu ba tempu naruk no sei hatudu produsaun iha futuru”, tenik Deputadu Bankada Opozisaun ne’e iha resintu Parlamentu Nasionál (PN), tersa ne’e.

Eis Ministru Agrikultura no Peska ne’e konsidera bee elementu impostante ba setór agrikultura, tanba ne’e bainhira Governu la halo jestaun ba bee, susar atu hasa’e produsaun ba haré, batar no área kultiva sira.

Nune’e mós Deputadu ne’e argumenta, bainhira konstrui barrajen barak, sei hamosu evaporasaun bee no udan sei mai ho di’ak.

Deputadu Assanami dehan tan, atu hetan produsaun hosi setór produtivu tenke halo jestaun di’ak ba bee, rai, no loron matan.

Nune’e, nia husu Governu presiza fó atensaun liu ba setór agrikultura, turizmu no peska, nune’e bele hetan produsaun hosi setór hirak ne’e, maibé tenke halo uluk jestaun ba bee.

“Durante ne’e ita seidauk halo jestaun ba bee, ne’e problema boot. Ita presiza bee ba ai-horis, animál, ikan, bee ba energía no bee ba ema”, nia akresenta.

Antes ne’e Proposta Orsamentu 2020 MAP hamutuk millaun $21,626, maibé hafoin halo ajustamentu ba proposta foun, orsamentu ba ministériu ne’e hetan redusaun millaun $4 resin, nune’e montante atuál millaun $17, 299.

Hosi proposta foun MAP, saláriu no vensimentu millaun $3,784, bens no serbisu millaun $9,824, transferénsia públika $214.000, kapitál menór $694.000 no kapitál dezenvolvimentu millaun $2,783.

Antes ne’e, iha tinan 2020 MAP planeia atu reabilita irrigasaun boot sira hanesan Waibaba, Bonuk, Karaulun, Bebui, Bulutu, Maliana I no Maliana II, tanba iha tinan 2017 to’o 2018 ministériu laiha osan manutensaun irrigasaun, hodi rezulta bee komesa halai la tuir dalan no sobu natar sira.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here