Bibi Rusa hadau malu bee iha illa Jaco. Imajen/Jogerjo Guterres.

DILI, 07 janeiru 2020 (TATOLI) – Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, hatete balada fuik liuliu rusa sira ne’ebé mate iha illa Jaco, Suku Tutuala, Postu Administrativu Tutuala, Munisípiu Lautem, tanba bailoro naruk no bee laiha ne’e afeta tebes ba setór  turizmu.

“Konserteza balada fuik ka rusa mate iha illa Jaco afeta mós ba turizmu tanba ita hatene rusa no balada fuik sira mós sai hanesan atrasaun ba turista sira atu vizita Timor-Leste liuliu ba sítiu turístiku sira,” Diretór Jerál Turizmu ne’e dehan hafoin akompaña Ministru Koordenadór Asuntu Ekonómiku (MKAE) halo audiénsia ho komisaun D ne’ebé trata asuntu ekonomia no dezenvolvimentu iha Parlamentu Nasionál, ohin.

José Quintas dehan tuir lei orgánika Oitavu Governu Konstitusionál katak Ministériu Agrikultura no Peska (MAP)  mak iha responsabilidade ba Parke Nasionál Nino Konis Santana liuliu Illa Jaco no balada fuik sira iha territóriu Timor Leste,  no halo intervensaun ona hodi bele salva balada fuik sira ne’e.

“Parke Nasionál Nino Konis Santana liuliu Illa Jaco ne’e sítiu turístiku, maibé atu jere balada sira ne’e MAP nia responsabilidade ne’ebé ami labele tama”, katak.

Nune’e, MTKI halo koordenasaun nafatin ho MAP atu oinsá bele foti asaun di’ak hodi salva balada fuik sira atu sai atrasaun ba turista sira iha fatin turístiku ne’e.

Notísia relevante : Parke Nasionál Tau Naran Eroi Nian Maibé Governu La Kuidadu, Rusa Kontinua Mate iha Jaco

“Importante la halimar mak ita-nia koordenasaun, oinsá Ministru Turizmu presiza halo koordenasaun nafatin ho MAP tanba iha papél no responsabilidade ba animál fuik sira ne’e tenke foti asaun”, hatenik.

Bainhira bailoron naruk no bee hahú menus iha Illa Jaco, rusa kuaze mate  barak, nune’e Governu Timor-Leste liuhusi MAP mós halo intervensaun hodi oferese bee no ró ida atu rusa sira bele hemu.

Aléinde iha intervensaun mós husi eis Primeiru-Ministru Kay Rala Xanana Gusmão no ajénsia internasionál no nasionál hodi fornese bee atu rusa sira bele moris.

“Ita presiza duni asegura balada fuik sira iha sítiu turístiku sira atu atrai turista sira vizita Timor-Leste liuliu ba sítiu ne’e”, hakotu.

Notísia relevante : “Tau Atensaun ba Jaco, Setór Turizmu mós sei La’o Di’ak”

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here