Sekretáriu Estadu Juventude no Desportu, Nélio Isaac Sarmento. Imajen Egas Cristovão

DILI, 07 janeiru 2019 (TATOLI)–Sekretáriu Estadu Juventude no Desportu, Nélio Isaac Sarmento, hateten Governu kontinua apoiu orsamentu ba Liga Futeból Amadora (LFA) hodi organiza jogu époka 2020 maibé subsídiu ba klube laiha tanba orsamentu la sufisiente.

“Ita kontinua fó apoiu nafatin ba Liga Futeból Amadora nune’e sira bele organiza nafatin jogu. Maibé, asuntu ida-ne’e Governu no Federasaun Futeból Timor-Leste hamutuk ho Liga Futeból Amadora sei tuur hamutuk hodi diskute atu oinsá bele halo jestaun ba orsamentu ho didi’ak,” Nélio dehan iha Parlamentu Nasionál, tersa ne’e.

Nia hatutan, Governu kontinua fó apoiu ba LFA tanba hosi époka 2015-2019 Governu simu ona relatóriu jogu no halo hela verifikasaun hodi ezije ba parte LFA atu kompleta tan relatóriu balun nune’e époka 2020 hahú sei introdús ba públiku.

Iha tinan 2019, orsamentu ne’ebé Governu apoiu ba Liga  époka 2019 hamutuk $500.000 resin. Enkuantu, klube ne’ebé hamahan an iha Primeira Divizaun LFA hamutuk 8 no Segunda Divizaun hamutuk 12.

Aleinde tulun hosi Governu, Federasaun Futeból Timor-Leste (FFTL) mós haraik osan hodi tulun LFA ho totál $150. 000 iha époka 2019.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here