Adido Traballadór Timor-Leste ba Austrália husi Sekretáriu Estadu Formasaun Profisionál no Empregu, António Armindo. Imajen/ Tatoli Egas Cristovão.

DILI, 06 janeiru 2020 (TATOLI) – Adidu Traballadór Timor-Leste ba Austrália hosi Sekretáriu Estadu Formasaun Profisionál no Empregu (SEFOPE, sigla portugés), António Armindo, fó sai katak timoroan besik 100 maka kria ona empregu iha rai-laran hafoin sira fila hosi Austrália liuhosi programa seasonal worker.

“Juventude ne’ebé maka SEFOPE haruka bá Austrália, barak maka mai halo fali sira-nia negósiu ki’ik balun, loke kafetaria no negósiu manu “ayam buras”, sira ne’ebé halo negósiu ki’ik kuaze ema na’in-100″, Adidu ne’e dehan ba jornalista sira bainhira akompaña traballadór na’in-26 tuir teste iha Hotel Novo Turismo, ohin.

Nia hatutan la’os negósiu sira ne’e de’it, maibé sira balun konsege loke kioske, loke ofisina, hola mikrolete no halo uma ba família.

“Sira konsege halo sira-nia negósiu ki’ik ida, ita bele dehan sira loke ona empregu ba sira nia an, nune’e mós loke empregu ba ema seluk”, salienta.

Entretantu, traballadór sira balun uza duni osan ne’ebé sira hetan ho sira-nia kosar-been rasik hodi ajuda ekonomia família nian.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here