Ekipa téknika sira halo levantamentu dadus ba timoroan sira ne’ebé halo rejistu hodi renova pasaporte Timor. Imajen embaixada Timor iha Londres

INGLATERRA, 6 janeiru 2020 (TATOLI) – Timor-oan liu 500 iha Inglaterra, Irlanda Norte no Portugál fó ona sira-nian dadus ba ekipa téknika hosi Ministériu Negosiu Estranjeiru no Kooperasaun no mós Ministériu Justisa atu renova pasaporte Timor.

Levantamentu dadus hahú loron 14 – 26 dezembru 2019 iha Inglaterra, loron 27 – 31 dezembru 2019 hala’o iha Portugál.

“Objetivu hosi ekipa téknika ne’e liuliu ba labarik sira ne’ebé mak depende ba pasaporte Timor-Leste atu kontinua eskola ou hala’o atividade eskola-nian no mós ba família ne’ebé mai husi Timor uza pasporte Timor i agora kaduka hotu ona. Ekipa nia objetivu foti dadus hodi renova pasporte, liu-liu fó prioridade ba Timor-oan sira ne’ebé mak pasaporte mate”, katak Celio Moniz, diretór ba asuntu konsulár no komunidade Timor ne’ebé lidera delegasaun.

Nia dehan tuir planu fulan-fevereiru ou marsu 2020, ekipa sei fila-fali hosi prosesa dokumentu sira ne’ebé rekolla ona, maibé hirak ne’e depende ba governu sentrál.

“Dadus ne’ebé ami rekolla ema 350, hosi númeru 290 labarik ne’ebé husu renova pasaporte”, katak Felix da Costa, Prezidente TAIS-NI (Timorese Association Inclusive Support-Irlanda do Norte).

Felix adianta tan: “Ema barak dupla nasionalidade maibé Billete Identidade (BI) seidauk iha, sira mós aproveita trata BI, sira seluk la’e, tanba dokumentu seidauk kumpletu”.

Nia afirma labarik lubun mak rejistu hodi hetan sertidaun Timor ba dahuluk tanba moris iha Irlanda.

“Ami husu atu fevereiru 2020 mai renova pasaporte tenke hela semana rua. Komunidade Timor NI pro-ativu tebes suporta TAIS NI, kada família fó kontribuisaun voluntária £10 hodi fasilita prosesu no servisu husi aeroportu to’o fatin atendimentu iha Dungannon iha 23, 24 no 26 dezembru 2019”.

Kontribuente: Celso Oliveira

Edisaun: Rita Almeida

HAKEREK NO HATÁN

Please enter your comment!
Please enter your name here