Terminál ró iha Portu Dili. Foto/JICA.

DILI, 06 janeiru 2020 (TATOLI) – Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves, hateten konstrusaun fízika re-alokasaun terminál ró iha Portu Dili atinje ona porsentu 100, nune’e prosesu inaugurasaun atu entrega ofisiál ba Governu Timor-Leste sei hala’o iha 15 janeiru.

“Ita iha ona koordenasaun ho Ministériu Negósiu Estranjeiru no Kooperasaun (MNEK) Timor-Leste no Embaixada Japaun no JICA hodi realiza prosesu inaugurasaun iha 15 janeiru ne’e”, Prezidente APORTIL ba TATOLI, iha knaar fatin Portu Dili, ohin.

Nune’e, Flávio dehan daudaun APORTIL koordena Governu Timor-Leste liuhusi MNEK no Universidade Nasionál Timor-Leste (UNTL), Embaixada Japaun no Ajénsia Kooperasaun Internasionál Japaun (JICA, sigla inglés) tanba halo inaugurasaun hamutuk ho edifísiu Politékniku UNTL iha Hera.

Nia dehan iha informasaun katak ema importante na’in-lima mak sei mai husi Japaun atu partisipa inaugurasaun ne’e.

Tuir oráriu, inaugurasaun edifísiu Politékniku Universidade Nasionál Timor Lorosa’e (UNTL) iha Hera iha 14 janeiru no 15 janeiru inaugura terminál Portu Dili ne’e.

“Aban, ami halo enkontru ikus hodi fahe konvite no halo preparasaun ho di’ak atubele hato’o agradesimentu ba Governu Japaun”, katak.

Governu Timor-Leste tenke prepara prosesu ho di’ak tanba Japaun ajuda ona Timor-Leste, nune’e tenke simu ho di’ak no hatudu katak eventu ba prosesu konstrusaun hotu ona no ofisialmente sira entrega mai iha Governu Timor-Leste, liuliu mai iha APORTIL atu jere.

Hafoin inaugurasaun ba re-alokasaun terminál ró ne’e, bele funsiona ho di’ak atu ró Nakroma no ró seluk bele halo ona operasaun.

Terminál ró ne’e ho naruk metru 100 ho luan metru 20, ne’ebé bele akomoda ró rua durante oras 24 nia laran, ho andár ida no bele akomoda ema na’in-300.

Konstrusaun ne’e tau fatuk dahuluk iha 8 agostu 2017 husi Governu Timor-Leste no hetan apoia finanseira husi Governu Japaun ho montante ¥2.197 (maizumenus millaun dólar amerikanu 20) no Governu Timor-Leste mós aloka osan millaun $1.

Projetu re-alokasaun terminál ferry ne’e konstrui hosi Tobishima Corporation no hetan supervizaun husi joint venture (konsórsiu) Japan Inc. Port Ides and Consultants, Ltd, ho durasaun konstrusaun hahú iha 31 marsu 2019 to’o 31 outubru 2019.

Notísia relevante : Terminál Ró Portu Dili Atinje Porsentu 100, Inaugura Iha 2020

Jornalista : Florencio Miranda Ximenes

Editora : Mari Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here