Vise-Ministru Obra Públika, Nicolau Lino Freitas Belo. Imajen Tatoli/António Gonçalves

DILI, 06 janeiru 2020 (TATOLI) – Ministru Obra Públika interinu, Nicolau Lino Freitas Belo, hateten proposta orsamentu foun 2020 ba Ministériu Obra Públika (MOP) ho totál millaun $229.

“Ami-nia orsamentu Ministériu Finansa fó ka prevee ba MOP iha 2020 nian, primeiru ne’e millaun $270 maibé halo tiha redusaun ba millaun $41, hela pur volta millaun $229”, dehan Ministru interinu ne’e hafoin akompaña husi diretór sira halo audiénsia ho komisaun E ne’ebé trata Asuntu Infraestrutura, Transporte no Komunikasaun iha Parlamentu Nasionál (PN), ohin.

Redusaun OJE 2020 ne’e mosu hafoin Primeiru-Ministru Taur Matan Ruak deside retira OJE 2020 ho montante biliaun $1,950 no redús ba biliaun $1,668, ne’ebé afeta ba proposta OJE husi ministériu sira inklui MOP.

Husi osan millaun $229 ne’e, nia dehan alokasaun boot liu sei ba Diresaun Jerál Eletrisidade (DGE) hodi fornese kombustivel ba sentrál eletrisidade Hera no Betano, no sei selu ba projetu ne’ebé la’o ona, maibé sei laiha projetu foun ne’ebé bele realiza iha tinan 2020.

Nia adianta orsamentu ne’ebé aloka iha kapitál dezenvolvimentu nian pur volta millaun $24, ne’e ba iha projetu estrada, eletrisidade, bee no saneamentu.

“Husi orsamentu ne’e nia difikuldade mak iha 2020 ne’e sei laiha projetu foun tanba iha kapitál dezenvolvimentu ita prevee de’it millaun $24 atu kontinua selu de’it obra ne’ebé la’o ona, ne’ebé ita hanaran re apresiasaun”, katak.

Audiénsia ne’e, atuál Vise-Ministru MOP akompaña husi xefe gabinete MOP, Nilton Tavares, Diretór Jerál Administrasaun no Finansa (DGAF), Januário Barbosa, Diretór Jerál Obra Públika (DGOP), Rui Hernani, Diretór Jerál Água no Saneamentu (DGAS), Gustavo da Cruz, Diretora Jerál Eletrisidade (DGE), Arlinda M.R.F.F Miranda, parte husi Diresaun Jerál Abitasaun Planeamentu Urbanu (DGHPU, sigla portugés), Prezidente Konsellu Administrasaun Institutu Jestaun Ekipamentu (IGE, sigla portugés), José Luís de Carvalho, inklui diretór nasionál no xefe departamentu sira.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here