Foto/Google.

DILI, 06 janeiru 2020 (TATOLI) – Ministru Agrikultura no Peska, Joaquim José Gusmão dos Reis Martins, hateten proposta Orsamentu Jerál Estadu (OJE) 2020 ba Ministériu Agrikultura no Peska la prevee estabelesimentu painél solár iha illa Jaco atu prodús maho-been ba balada sira.

“Orsamentu 2020 la prevee kona-ba estabelesimentu painél solár iha Jaco maibé só otimiza kapturasaun bee de’it, liuhosi halo tanke boot hodi enxe bee ba balada sira”, ministru ba jornalista sira iha Parlamentu Nasionál (PN), ohin.

Maski nune’e, MAP sei haree fali iha orsamentu retifikativu atubele rezolve painél solár, tanba orsamentu 2020 MAP seidauk hatene kuotasaun maizmenus ho osan hira, maibé antes atu kria painél solár iha Jaco, MAP sei halo estudu hafoin bele rezolve dala-ida.

Notísia Relevante : 2020, MAP Estabelese Fonte Bee Permanente iha Jaco

“Ita hakarak estabelese painél solár iha Jaco maibé daudaun ita seidauk hatene kuotasaun maizumenus osan hira. Ita sei estuda didi’ak hafoin ita bele rezolve dala-ida”, dehan.

Enkuantu, iha proposta OJE 2020, MAP prevee orsamentu atu hola bee hodi lori bá Jaco no orsamentu atu halo tanke boot hodi enxe bee atu balada sira bele hemu.

Antes ne’e, MAP serbisu hamutuk ho peskadór sira lori bee bá Jaco, maibé MAP mós entrega ona ró ida ba guarda florestál atubele ajuda hodi kontrola situasaun balada sira nian iha Jaco.

Notísia Relevante : MAP Entrega ona Ró ba Guarda Florestál hodi Transporta Bee Bá Jaco

Entretantu, proposta orsamentu 2020 ne’ebé prevee ba Parke Nasionál Nino Konis Santana hamutuk rihun $40.

Jornalista : Zezito Silva
Editora : Maria Auxiliadora

HAKEREK NO HATÁN

Please enter your comment!
Please enter your name here