Ministru Ensinu Superiór, Siénsia no Kultura, Longuinhos dos Santos. Imajen/TATOLI

DILI, 06 janeiru 2020 (TATOLI) – Orsamentu pakote orijinál Ministériu Ensinu Superiór Siénsia no Kultura (MESSK) ne’ebé aprezenta ba Parlamentu Nasionál (PN) iha outubru 2019 ho valór millaun $10,5. Orsamentu ne’e, millaun $6 ba Ministériu Ensinu Superiór no millaun $4,5 ba Arte no Kultura. Husi totál orsamentu ne’e redús tiha ba millaun $7.209.780. Signifika, verba MESSK nian hetan redusaun millaun $3.3 ka reprezenta 32%.

Ho redusaun ne’e, Ministru Ensinu Superiór Siénsia no Kultura Longuinhos dos Santos hateten, ba tinan 2020 MESSK sei kansela ninia programa ne’ebé planeadu ona mak hanesan estudu implementasaun programa husi suku nian, redús formasaun lian portugés inklui rekrutamentu formadór na’in sia sei ba na’in lima de’it, redús mós peritus na’in haat ne’ebé sei rekruta, ba na’in rua de’it.

Iha parte, Arte no Kultura nian mós sei kansela fundu rotativu ho valór $1,5 no prezervasaun uma-lulik ho valór millaun $1 redús ba $200.000. Ho kanselamentu atividade prioridade orgánika rua nian ne’e mak orsamentu ne’ebé preve hamutuk millaun $7,2 ne’ebé aloka ba Arte no Kultura millaun $2,2 no Ministériu Ensinu Superiór millaun $ 5 de’it.

“Orsamentu refere ita sei koloka ba kategoria lima mak hanesan saláriu no vensimentu, bens servisu, transfarénsia Públikas, kapitál menór no kapitál dezenvolvimentu,” hateten Ministru Longuinhos dos Santos iha iha aprejentasaun orsamentu MESSK nian ba deputadu Komisaun G iha Parlamentu Nasionál, ohin.

Husi pakote fiskál foun ne’e, tuir governante ne’e katak sei lori implikasaun ba programa prioridade MESSK nian mak hanesan kontinuanidade ba funsionamentu Konsellu Reitór sira, Formasaun lian Portugés, implementa programa asesu ingresu ne’ebé realiza ona iha 2019.

Haree mós kona-ba kurríkulu padraun mínimu, esforsa kooperasaun internasionalizasaun ba formasaun dosente iha pos-graduasaun, sei partisipa enkontru Ministru Ensinu Superiór iha Cavo Verde, atu moderniza Institutu Poltékinu Betano no programa sira seluk tan inklui programa Arte Kulrura nian ne’ebé atu loke akadémika arte kultura, industria no kreativa, konstrusaun biblioteka nasionál, reabilitasaun no prezervasaun uma-lulik sira.

Maske orsamentu ne’e hetan redusaun, maibe MESSK nu’udar ministériu foun iha formasaun VIII Governu Konstitusionál ne’e, iha nia ezekusaun orsamentu iha 2019, konsege atinji ona to’o 84%.

Notísia relevante:OJE 2020 Ba MESSK Redus

Jornalista    : Tomé Amado

Editór           : Rafy Belo

HAKEREK NO HATÁN

Please enter your comment!
Please enter your name here