Ministru Agrikultura no Peskas, Joaquim José Gusmão dos Reis Martins. Imajen/Egas Cristovão

DILI, 06 janeiru 2020 (TATOLI)—Proposta orsamentu Ministériu Agrikultura no Peska (MAP), hetan redusaun millaun $4-resin hosi Komité Revizaun Orsamentu Polítika (KROP).

Proposta anteriór MAP iha millaun $21,626,730, maibé liuhosi KROP ko’a millaun $4-resin, hela millaun $17.299.

Hosi proposta foun millaun $17.299 ne’e kompostu hosi saláriu no vensimentu millaun 3.784, bens no serbisu millaun $9.824, transferénsia públika rihun $214, kapitál menór rihun $694 no kapitál dezenvolvimentu millaun $2.783.

Ministru Agrikultura no Peska, Joaquim José Gusmão, hateten redusaun ne’e ba millaun $15-resin, maibé KROP konsidera fali kapitál dezenvolvimentu, entaun sa’e ba millaun $17.299 ne’e.

“Ita husu KROP konsidera fali kapitál dezenvolvimentu kona-ba manutensaun ba irrigasaun nian ne’ebé mak sai mós preokupasaun deputadu sira bainhira sira halo fiskalizasaun. Infelizmente KROP mós konkorda hodi fó fila-fali kapitál dezenvolvimentu ne’ebé ko’a ona, ne’e mak hamutuk millaun $17-resin ne’e”, dehan nia ba jornalista sira, iha resintu Parlamentu Nasionál, segunda ne’e.

Nia haktuir, rúbrika ne’ebé hetan redusaun mak hanesan viajen estranjeiru, bens no serbisu, kapitál menór no kapitál dezenvolvimentu. Maibé, kapitál dezenvolvimentu nian fó fila-fali hamutuk millaun $2-resin ne’e.

Nia esplika, prioridade ba 2020 mak agrikultura, área produsaun hare no batar. Programa mak halo espansaun ba iha área kultiva.

Ministru Joaquim rekoñese, ho redusaun ne’e iha impaktu tanba susar atu dezenvolve di’ak liután programa ne’ebé trasa ona.

“Maibé ita tenta Jere orsamentu ne’ebé mak iha. Ho limitasaun ne’e ita hakarak envolve mós parseiru dezenvolvimentu sira no envolve mós setór privadu bele hanoin lisuk dezenvolve setór agrikultura”, nia katak.

Jornalista: Evaristo Soares Martins

Editór: Xisto  Freitas

HAKEREK NO HATÁN

Please enter your comment!
Please enter your name here