Vise Prezidente Komisaun D, Ricardo Baptista. Imajen/Cipriano Colo

DILI, 06 dezembru 2020 (TATOLI) – Iha Proposta Orsamentu Jerál Estadu (OJE) 2020 foun ho montante biliaun $1,668, antes ne’e prevee ba Institutu Petróliu no Jeolojia (IPG-sigla portugués) ho montante millaun $3,560, maibé hetan redusaun $500.000.

Orsamentu IPG tama iha Ministériu Petróliu no Rekursu Minerál (MPRM), ne’ebé ministériu ne’e ninia orsamentu ba tinan fiskál 2020 hamutuk millaun $88,333, maibé hafoin hetan redusaun iha proposta foun ho montante millaun $87,528.

Hafoin Entidade relevante hanesan MPRM, IPG no TIMOR GAP hala’o audiénsia ho Komisaun D ne’ebé trata Asuntu Ekonomia no Dezenvolvimentu, Vise-Prezidente Komisaun D, Ricardo Baptista, rekoñese antes ne’e iha problema orsamentu maibé hafoin halo audiénsia, konsege ajusta ona ho mudansa.

“Antes ne’e komisaun haree hetan problema balun iha orsamentu MPRM nian no rekomenda atu halo redusaun no ohin sira mai aprezenta fila-fali, sira halo duni redusaun. Ministériu mai aprezenta fila-fali, hafoin orsamentu ne’e retira husi Parlamentu iha dezembru tinan kotuk. Tanba ne’e ohin sira aprezenta orsamentu ho montante foun”, informa Deputadu Bankada CNRT ne’e iha resintu Parlamentu Nasionál (PN), segunda ne’e.

Maski nune’e, Deputadu ne’e fó hanoin katak montante ne’e konfirmadu ona iha komisaun maibé bele iha mudansa iha diskusaun OJE semana oin bainhira iha deputadu balun aprezenta proposta.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here