Sesaun plenária Parlamentu Nasionál. Imajen/Tatoli

DILI, 06 janeiru 2020 (TATOLI) – Deputadu Parlamentu Nasionál (PN), Komisaun G ne’ebé trata asuntu edukasaun, ejize ba Ministériu Ensinu Superiór Siénsia no Kultura (MESSK) atu kria mekanizmu di’ak ida hodi hatun propinas eskola husi Institutu Ensinu Superiór Privadu (IESP) sira nian, tanba konsidera estudante barak labele selu osan eskola tan de’it rendimentu ekonomia família nian fraku.

Liuhusi audiénsia komisaun G ho MESSK ne’e, Deputada husi bankada CNRT, Bendita Magno husu ba Ministru Longuinhos dos Santos kona-ba alokasaun orsamentu ba IESP sira maibé propina eskola nian kontinua la’o nafatin. Preokupasaun ne’e nia hato’o tanba konsidera katak karik governu aloka osan ba IESP sira ne’e oinsá ho propina eskola nian hamenus ka lae?

“Ita tenke haree asuntu ne’e tanba Instituisaun Privadu sira ne’e hetan reseitas husi estudante sira. Ita tau nafatin osan maibé sira husu nafatin osan husi inan-aman estudante sira nian,” Deputada Bendita hateten, iha Parlamentu Nasionál (PN), ohin.

Tuir reprezentante povu ne’e katak Governu tenke iha ona polítika ida hodi halo ho IESP sira ne’e tu nune’e sira labele hetan fundu sira ne’e husi parte rua. Kuandu polítika MESSK nian hakarak tau ona osan ba IESP entaun sira mós tenke redús propina eskola nian.

Nia dehan, iha governu anteriór Parlamentu Nasionál (PN) mós apoiu orsamentu ba IESP sira, maibe liuhusi fundus sosiedade sívil ne’ebé iha Gabinete Primeiru-Ministru (GPM) nian. Maibé, osan sira ne’e atu ajuda IESP sira iha parte konstrusaun. Portantu, sira la presija husu sira-nia relatóriu.

Agora osan sira ne’e kuandu ministru hasai husi orsamentu ministériu nian, entaun governu iha obrigasaun atu husu ba IESP sira tenke kumpre no rona governu ninia intervensaun. “Ha’u husu ba ministru atu ejize ba Institutu Ensinu Superiór Privadu sira tenke redús reseita eskola nian”.

Iha fatin hanesan, Ministru Longuinhos dos Santos esplika katak IESP sira ne’e hamriik ho estatutu autonomu. Entaun sira independente ba administrasaun no finansiamentu. Tan ne’e presija atu haree. Nia dehan, la fasil tanba presiza iha mekanizmu di’ak ida.

Maibé liuhusi konsellu reitór sira ne’ebé establese ona, Ministru Longuinhos dos Santos garante, sei iha diskusaun liután kona ba faze ida ne’e, presija tempu tanba durante ne’e IESP sira bazeia ba estatutu universidade nian ne’ebé durante ne’e goza hela sira-nia finansiamentu.

Maske nune’e, governante ne’e katak maske la fásil atu muda sistema ida maibé liuhusi esforsu saida de’it naran katak, tuir nia, bele lori benefísiu ba parte rua.

Notísia relevante:MESSK-Konsellu Reitór Ko´alia Polítika Nasionál MESSK ba Tinan 2020

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here