DILI, 06 janeiro 2020 (TATOLI)–Governu liuhosi Ministru Defeza no Ministru Interiór Interinu, Filomeno Paixão deJesus, hamutuk ho Xefe Estadu maior FALINTIL-Forsa Defeza Timor-Leste, Lere Anan Timur, Komandante PNTL, Komisáriu Faustino da Costa no estrutura tomak, segunda ohin, halo avaliasaun ba dezafiu no progresu servisu ne’ebé maka instituisaun hirak ne’e halo ona durante tinan 2019.
Sorumutu ne’e realiza iha Edifísiu Ministériu Financas Ai-tarak Laran Dili, ho tema maka ‘Avaliaçăo no ano trasanto (2019) e uma projeçăo para o ano (2020)’.
Ministru Filomeno Paixão deJesus, hateten avaliasaun ne’e ho objetivu atu hadia di’ak liután polítika no planu instituisaun nian ba dezenvolve PNTL no F-FDTL hodi serbi estadu no povu iha tinan 2020.
“Objetivu atu halo avaliasaun totál ba servisu PNTL no F-FDTL iha 2019 hodi buka fali medida konkretu seluk atu hadia di’ak liután servisu ne’ebé mak forsa rua sei halo ba komunidade iha tinan 2020 nian”, dehan, Governante ba Jornalista sira iha edifísiu Ministériu Financas Ai-tarak Laran Dili
Filomeno Paixão apresia ho prestasaun servisu hosi Polisia Nasionál Timor-Leste no FALINTIL-FDTL ne’ebé presta ba komunidade ho profesionál hodi asegura situasaun seguransa ida hakmatek durante kotuk.
Iha biban ne’e, Xefe Estadu maior FALINTIL-Forsa Defeza Timor-Leste, Lere Anan Timur, husu ba ofisiaís iha Instituisaun F-FDTL no PNTL atu halo reflesaun kona-ba servisu hotu-hotu ne’ebé maka halo ona durante tinan kotuk hodi projeta di’ak liután ba futuru.
Iha sorumutu ne’e , Nia mós apela ba membru PNTL no F-FDTL ne’ebé maka sei kontinua envolve iha grupo ilegál sira atu rejignaan hodi fila ba vida sivíl tanba sei estraga imajen instituisaun nian.
“Ohin, Ha’u apela ba ofisiaís hotu- hotu atu hatudu mentalidade no karatér atu bele sai lutu ba nasaun ho loloos,”tenik Lere.
Xefe Estado Maior F-FDTL ne’e observa katak númeru krime iha tinan kotuk menus tanba ne’e espera iha tinan 2020, F-FDTL no PNTL sei servisu makaas liután hodi hametin paz no hakmatek ba apoiu prosesu dezenvolvimentu.
Jornalista : Domingos Piedade Freitas
Editór :Francisco Simões