Jogu CPLP. Imajen/Espesiál

DILI, 06 janeiru 2020 (TATOLI) – Diretór Tékniku Federasaun Futeból Timor-Leste (FFTL), Gaspar Quintão, hateten modalidade futeból U-17 husi federasaun ne’ebé mak sei partisipa iha jogu Komunidade Nasaun Ko’alia Lian Portugés (CPLP-sigla portugés) ba dala-XII ne’ebé sei realiza iha jullu tinan ne’e, to’o ohin loron seidauk iha preparasaun tanba seidauk rona informasaun klaru hosi Governu.

“Jogu CPLP,  ami-nian U-17 mak sei partisipa maibé ami seidauk iha preparasaun másimu tanba sei rona lai informasaun hosi Governu. Buat hotu ne’e Governu mak toma konta entaun ami sei rona husi sira”, dehan Quintão ba Agência TATOLI iha edifísiu FFTL, Bairro Formosa, segunda ne’e.

Nia haktuir, antes ne’e modalidade hotu ne’ebé atu partisipa iha jogu internasionál ne’e hala’o enkontru.

“Ami hala’o enkontru beibeik ona. Enkontru ho modalidade hotu ne’ebé atu partisipa ho Governu hanesan Konfederasaun Desportiva Timor-Leste no Komité Olímpiku Timor-Leste”, nia haklaken.

Gaspar subliña, daudaun ne’e jogadór barak tanba balun joga hela iha liga juvenil ne’ebé la’o hela.

Jogu CPLP sei partisipa hosi nasaun sira ne’ebé hamahan-an iha CPLP, ne’ebé tinan ne’e Timor-Leste mak sei sai hanesan uma-na’in hodi organiza jogu.

Jornalista: Hortênçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here